Almatyda jyl basynan beri 300-ge jýyq adam koronavırýs juqtyrǵan

ALMATY. KAZINFORM – Almaty qalasynyń Sanıtarııalyq-epıdemıologııalyq baqylaý departamenti megapolıste koronavırýstyq ınfektsııa boıynsha epıdemıologııalyq jaǵdaı turaqty ekenin habarlaıdy.

Departament málimetine sáıkes, sońǵy 7 kúnde koronavırýs juqtyrýdyń 2 jaǵdaıy tirkelgen. Al 2024 jyldyń qańtar aıynan bastap 27 maýsymǵa deıin qala turǵyndary arasynda koronavırýs ınfektsııasynyń rastalǵan 282 jaǵdaıy bolǵan. Onyń ishinde 14 jasqa deıingi balalar arasynda – 31 jaǵdaı, jasóspirimder arasynda – 6 jaǵdaı, eresekter arasynda – 245 jaǵdaı.

- Koronavırýs ınfektsııasyn juqtyrýdyń aldyn alý úshin qorǵanys maskalaryn qoldaný jáne adamdar kóp jınalatyn jerlerge barýdan jáne temperatýrasy joǵary naýqastarmen baılanysta bolýdan bas tartý usynylady. Aýrýdyń aldyn alý úshin úı-jaılardy únemi jeldetip otyrý, dymqyl tazalaý, sondaı-aq jeke gıgıena erejelerin saqtaý usynylady. Eger respıratorlyq aýrýlardyń belgileri paıda bolsa, maska kıip, dereý medıtsınalyq kómekke júginý kerek, - dedi Almaty qalasynyń Sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova.