Almatyda jyl basynan beri 3 myń adam qyzylsha juqtyrǵan
ALMATY. KAZINFORM - Almaty qalasynyń sanıtarııalyq-epıdemıologııalyq baqylaý departamentiniń málimetine sáıkes, megapolıste jyl basynan beri qyzylshanyń 3176 rastalǵan jaǵdaıy tirkelgen. Onyń ishinde 14 jasqa deıingi balalar arasynda 1954 jaǵdaı (61,3%), 15 jastan 18 jasqa deıingi jasóspirimder arasynda – 165 (5,2%) jáne eresekter arasynda – 1057 (33,4%).
Departament balalar arasyndaǵy aýrýshańdyq negizinen vaktsınatsııadan bas tartý sebebinen bolatynyn habarlaıdy.
- Qyzylshany juqtyrýdy, sondaı-aq onyń asqynýyn boldyrmaıtyn jalǵyz tıimdi qural - vaktsınatsııa. Qyzylshaǵa qarsy josparly vaktsınatsııa 2 ret: birinshisi – 1 jasta (12-15 aı), ekinshisi – 6 jasta júrgiziledi. Bul - vaktsınatsııadan keıingi ımmýnıtetti damytýǵa múmkindik beredi.
2023 jylǵy 10 qarasha men 2024 jylǵy 02 maýsymnyń aralyǵynda qalada qyzylsha, qyzamyq, parotıtke qarsy qosymsha jappaı ımmýndaý sheńberinde barlyǵy 162 294 adam qamtyldy. Onyń ishinde 6 aıdan bastap 10 aı 29 kúnge deıingi 13 119 bala, 2 jastan 4 jasqa deıingi balalar – 79 785, medıtsına qyzmetkerleri – 8676 jáne basqa jastaǵy buryn qyzylshaǵa qarsy josparly ekpe almaǵan (vaktsınatsııa kýrsy tolyq emes) tolyqtyra ımmýndaý boıynsha 60 714 bala, - dedi Almaty qalasynyń sanıtarııalyq-epıdemıologııalyq baqylaý departamenti basshysynyń orynbasary Gaýhar Katkenova.
Departament málimetinshe, ekpelerdi júrgizý úshin DDU sertıfıkattaǵan jáne Qazaqstan Respýblıkasynda tirkelgen qyzylshaǵa, qyzamyqqa, parotıtke qarsy aralas vaktsına qoldanylady. Vaktsınatsııa turǵylyqty jeri boıynsha qalanyń emhanalarynyń barlyq egý kabınetterinde tegin júrgiziledi.
