Almatyda jyl basynan beri 20 myń bala medıtsınalyq kómekke júgingen
ALMATY. KAZINFORM – Balalarǵa jedel medıtsınalyq kómek ortalyǵynyń qabyldaý bóliminiń meńgerýshisi, balalar hırýrgy jáne travmotolog Meıirjan Qurmanálıev jazǵy demalys kezinde balalardyń densaýlyǵyna muqııat bolýǵa shaqyrdy.
Balalardyń jaraqat alýy da jasyna qaraı bolady. Mektepke deıingi jastaǵylary kóbine eresekter durys qaramaǵandyqtan jazym bolyp qalyp jatsa, oqýshylar jaǵy oınap júrip, birnárseni ustaımyn dep júrip jaraqat alyp jatady, - dedi Meıirjan Qurmanálıev.
Onyń aıtýynsha, balalardyń jaraqattanyp qalýynyń negizgi sebepteri kelesideı:
Balaǵa qaramaǵannan (45 paıyzǵa deıin);
Balanyń baıqamaı jaraqat alýy (25 paıyzdan astam);
Oqys oqıǵa (2 paıyzǵa jýyq), jol-kólik oqıǵasy men basqa da sebepter.
Almaty qalasyndaǵy balalar aýrýhanalarynyń qabyldaý bólimderine bir jyl ishinde 104 myńnan astam bala jedel medıtsınalyq kómekke júgingen. Onyń ishinde 21,8 myńy neırohırýrgııa jáne 48 myńǵa jýyǵy travmatologııa boıynsha em alǵan. Neırohırýrgııalyq dıagnozben 3,3 myń naýqas aýrýhanaǵa jatqyzylsa, 3,9 myńǵa jýyǵy jeńil jaraqat alǵan. Taǵy kúıik shalǵan 1,6 myń adam kómekke júginip, onyń 1 myńnan astamy aýrýhanaǵa jatqyzyldy.
Al osy jyldyń 5 aıynda Almaty qalasynyń Balalarǵa jedel medıtsınalyq kómek ortalyǵynyń qabyldaý bólimine 19,6 myń bala tústi.
Balalar jaraqattanyp qalmaýy úshin dáriger ata-analarǵa mynandaı keńes beredi:
jol qaýipsizdigi týraly balalarmen únemi áńgimelesý kerek;
shuǵyl kómek qyzmetiniń nómiri yńǵaıly jerde jazýly tursyn;
balańyzǵa qaýipsizdik erejesin túsindirińiz;
dári-dármekti balanyń qoly jetpeıtin jerde ustańyz;
sýdyń mańynda balany qaraýsyz qaldyrmańyz.
Eske salaıyq, Almatyda mektep janyndaǵy lagerler jumysyn bastaıtynyn jazǵanbyz.