Almatyda jyl basynan beri 20 myń adam tumaý juqtyrǵan

ALMATY. KAZINFORM – Almatyda jyl basynan beri JRVI, tumaý aýrýlarynyń 20 544 jaǵdaıy tirkeldi. Bul týraly Almaty qalasynyń Sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova aıtty. 

Onyń aıtýynsha, árbir 100 myń turǵynnyń 896-sy JRVI men tumaý juqtyrady. Biraq bul kórsetkish ótken jyldyń osy kezeńimen salystyrǵanda 22,0%-ǵa tómen. Byltyr 25 326 jaǵdaı bolǵan.

– Almaty qalasynda qazirgi ýaqytta jedel respıratorlyq ınfektsııalar boıynsha (budan ári – JRVI) epıdemıologııalyq ahýal turaqty. Ótken 38 aptada JRVI, tumaý aýrýlarynyń 20 544 jaǵdaıy tirkeldi. Aýrýdyń 60,7%-y balalardy qamtıdy. Tumaýdyń aldyn alýdyń eń tıimdi ádisi - ýaqtyly vaktsınatsııa alý, - dedi ol.

Sondaı-aq Ásel Qalyqova tumaýdyń aldyn alý maqsatynda jergilikti ákimshilik esebinen «táýekel tobyndaǵy» turǵyndardy vaktsınatsııalaý 19 qyrkúıekte bastalǵanyn habarlady. 26 qyrkúıektegi jaǵdaı boıynsha tumaýǵa qarsy 19 379 adam ekpe aldy. Vaktsınatsııalaý qarasha aıynyń sońyna deıin júrgiziledi. 

– Bıyl «táýekel tobyndaǵy» adamdardy vaktsınatsııalaý úshin jergilikti bıýdjet qarajatyna 200 000 doza mólsherinde úsh valentti tumaýǵa qarsy reseılik «Grıppol Plıýs» vaktsınasy satyp alyndy, - dep atap ótti departament ókili.

Eske salaıyq, buǵan deıin Almatyda adam papılloma vırýsyna qarsy vaktsınatsııa 30 qyrkúıekte bastalatynyn jazǵanbyz.