Almatyda jyl basynan beri 13 myńnan astam kólik ekonormany buzǵan
ALMATY. KAZINFORM – Almaty ekobeketterinde jyl basynan beri kólik shyǵaryndylarynyń belgilengen normadan asqan 13 myńnan astam jaǵdaıy anyqtaldy.
«Renessans plıýs» JShS ókilderi málimetine qaraǵanda, 2026 jyldyń basynan beri Almatydaǵy 19 statsıonarlyq ekologııalyq bekette avtokólikterdiń paıdalanylǵan gazdaryna 116 myńnan astam tekserý júrgizildi.
Monıtorıng nátıjesinde ýly zattar men tútin shyǵaryndylarynyń belgilengen normatıvten asqan 13 076 jaǵdaıy anyqtaldy. Ásirese, Alataý jáne Naýryzbaı aýdandarynda eń kóp zańbuzýshylyq tirkelgen.
Kompanııa málimetinshe, avtokólik shyǵaryndylaryna monıtorıng turaqty túrde júrgiziledi. Bul jumys kólik quraldaryn tehnıkalyq baıqaýdan ótkizý kezinde qoıylatyn talaptardyń saqtalýyn baqylaýǵa baǵyttalǵan.
— Júrgizilip jatqan monıtorıngtiń maqsaty — shyǵaryndy mólsheri belgilengen normadan asatyn kólik quraldaryn anyqtaý, atmosferalyq aýanyń lastaný deńgeıin tómendetý jáne aýany qorǵaý sharalarynyń tıimdiligin arttyrý, — delingen habarlamada.
Eske salaıyq, buǵan deıin Almatyda maýsym aıynda ekologııalyq talaptardy buzǵan 200 kólik anyqtalǵanyn jazǵanbyz.
