Almatyda jyl basynan beri 105 aǵash qulady
ALMATY. KAZINFORM — Almatyda aǵashtardy sanıtarlyq kesý jumystaryna baılanysty túsinikteme berildi.
Qalalyq ekologııa jáne qorshaǵan orta basqarmasy áleýmettik jelidegi paraqshasynda «Almatyda nege aǵashtar qulap jatyr» degen suraqqa jaýap berdi.
Vedomstvo málimetinshe, jyl basynan beri qalada 105 aǵash qulap, 7 iri butaq synǵan. Bul kórsetkish ótken jylmen salystyrǵanda 20%-ǵa artqan. Basqarma ókilderiniń aıtýynsha, syrtynan saý ári jasyl bolyp kóringenimen, dińi shirip, tamyr júıesi álsiregen bolýy múmkin. Sondyqtan qalada qaýipti aǵashtardy anyqtaý jáne sanıtarlyq maqsatta kesý jumystary júrgizilip jatyr.
— Aǵash kesýge keıde turǵyndar qarsy bolyp jatady. Sebebi syrtynan saý bolyp kórinedi. Alaıda mamandar kelip qaraǵannan keıin ol aǵashtyń adam ómirine qaýip tóndirip turǵany anyqtalady. Al qaýiptiń aldyn alý, onyń saldarymen kúreskennen góri mańyzdy, — deıdi vedomstvo ókilderi.
Eske salaıyq, Pavlodarda kóligin aǵash basyp qalǵan júrgizýshi ákimdikten 4 mln teńge óndirip aldy.
