Almatyda jıi sý basatyn ýchaskelerde jańa aryq júıesi salynady

ALMATY. KAZINFORM – Almatyda sý basý máselesin joıý úshin sorǵy stantsııasyn salyp, aryq júıesin jańǵyrtý josparlanyp otyr.

Almaty ákimdiginiń málimetine sáıkes, Bostandyq aýdany, Jáńgir han kóshesinde nóser jaýynnan keıin únemi 1,2 metrge deıin sý jınalady. Sebebi bul eńiste ornalasqan jer, buryn ózen arnasy bolǵan. Máseleni sheshý úshin saǵatyna 400 tekshe metr sý aıdaıtyn káriz sorǵy stantsııasyn salý qajet.

– Byltyrǵy nóser jaýyn Ál-Farabı dańǵyly boıynda da úlken zardap ákelgen edi. Qazir bul baǵytta joba daıyndalyp, memlekettik saraptamadan ótken. Onda Qapparov kóshesinde aryq júıesin salý, al Úshkempirov kóshesinde eki iri sý qabyldaǵysh ornatý qarastyrylǵan, - dep habarlady ákimdikten.

Sondaı-aq Qabanbaı batyr kóshesinde de sý burý júıesiniń olqylyǵy anyqtaldy. Aryq ótkeli opyrylyp, jaýyn kezinde sý tasyp, jolǵa shyǵyp ketedi. Qala ákimdigi munda úlken dıametrli temirbeton qubyrlaryn ornatýdy josparlap otyr. 

Odan bólek Shyǵys aınalma joly – Halıýllın – Taırov – Shaqshaq Jánibek kósheleriniń aýmaǵynda sý qubyry jáne káriz júıesi salynyp jatyr. Munda merdiger uıym jolǵa túsetin salmaqty azaıtý úshin jerdi tesý ádisin qoldanyp jatyr. 

Eske salaıyq, 16 qyrkúıek kúni jańbyr kezinde megapolıste 6 úıdi jáne 7 úıdiń aýlasyn sý basty.

Odan bólek qatty jaýyn-shashyn saldarynan Amanjol kóshesindegi jol jabyny opyrylyp, 13 kólik zaqymdandy.