Almatyda jigitpen kezdesýge barǵan boıjetken mert boldy
Almatylyq boıjetken jigitimen dámhanada alǵash ret kezdesken soń qaıtys boldy. Bul týraly jýrnalıst Sandýǵash Dúısenova áleýmettik jelide jazdy, dep habarlaıdy Kazinform.
Sandýǵash Dúısenovanyń málimetinshe, kezdesýge barǵan qyzdyń aty-jóni Aınagúl Kenchebaeva bolǵan. Ol qazannyń 17-si kúni er adamnyń qolynan qaza tapty.
«Alǵashynda olar jáı otyryp áńgimelesken, keıin er adam spırttik ishimdik iship alyp, qyzǵa qol júgirte bastaǵan. Basynda Aınagúl ony tynyshtandyrýǵa tyrysty, biraq anyq janjal shyǵatyny belgili bolǵan kezde qyz 102 nómirine habarlasqan. Dámhanada demalyp otyrǵandar jigittiń qyzdy syrtqa alyp shyqqanyn kórgen, biraq, eshkim arasha túspegen. Qazir eshkim naqty ne bolǵanyn bilmeıdi, alaıda, arada 20 mınýt ótken soń, qyz shaqyrǵan polıtseıler kelip, qyzdyń qaıtys bolǵanyn kórgen.
Jigit eshkimdi óltirgisi kelmegenin, qyzdy tek ıterip jibergenin aıtady. Qyz bordıýrge basymen qulap, jan tapsyrǵan. Jigit qorqyp qashyp ketken, keıin qaıta keldi. Ol jedel járdemdi shaqyrý úshin emes, ózimen birge ala ketken qyzdyń uıaly telefonyn qaıtarý úshin. Bul urlyq pa? Álde ol, eger qyzdyń telefonyn ózimen alyp ketse, onyń sol keshte kimmen keshki as ishkenin eshkim bilmeı qalady dep oılady ma? Ol qylmysyn jasyrǵysy keldi me?», - dep jazdy Sandýǵash Dúısenova.
Ol sondaı-aq marqum Aınagúldiń týystarynyń pikirlerin jarııalady.
«Oqıǵa ótken soń qyzdyń ata-anasynyń úıine ustalǵan jigittiń týystary keldi. «Olar keshirim suraıdy, biraq, bizdiń qyzdy olar emes, olardyń uldary óltirdi ǵoı, aıtpaqshy, ol otbasyndaǵy jalǵyz ul eken, biz keshirmeımiz, biz qyzymyzdy joǵalttyq jáne ol qyzymyzdyń ólimi úshin jaýap berýi tıis», - dep jatyr Aınagúldiń týystary.
«Qaı ata-ana jalǵyz balasynyń túrmege otyrǵanyn qalaıdy. Biz olardyń búkil tanystaryn tartyp, uldaryn túrmeden shyǵaryp ala ma dep qorqamyz, - dep Aınagúldiń ata-anasy alańdap otyr.
Sandýǵash Dúısenova Aınagúldiń eńbekqor, farmatsevtıkalyq kompanııanyń dırektoryna deıin óskenin, qalǵan ómirin ózine arnaıtyn sátte, tragedııalyq túrde qaza tapqanyn jazdy.
«Qyzdy keshe jerledi, ata-anasy qaıǵydan áli boı jaza almaı otyr. Tek ádilettiń ornaýyn qalap otyr», - dep jazdy ol.
Almaty qalalyq polıtsııa departamenti qylmysty jasaǵan kúdikti ustalyp, qamalǵanyn habarlady.
«Atalǵan derek boıynsha Túrksib aýdandyq polıtsııa basqarmasy QR QK-niń 99-baby 1-bóligi boıynsha sotqa deıingi tergeý amaldary júrgizilip jatyr. Qylmysty jasady degen kúdikti 1991 jyly týǵan T. esimdi azamat ustaldy jáne qamaýǵa alyndy. Qylmystyq istiń sheńberinde tergeý áreketteri tergeýdiń obektıvtiligi, jan-jaqtylyǵy jáne tolyqtyǵy qaǵıdattaryn qatań saqtaı otyryp júzege asyrylady. Saraptama taǵaıyndaldy. Tergeý barysy Polıtsııa departamenti basshylyǵynyń baqylaýynda», - dep habarlady qalalyq polıtsııa departamentiniń baspasóz qyzmeti.
