Almatyda «Jetisý-Semıreche» bazary buzylyp jatyr
ALMATY. KAZINFORM – Almatyda zańsyz salynǵan «Jetisý-Semıreche» bazaryn buzý jumystary bastaldy.
Qala qurylysyn baqylaý basqarmasynyń málimetinshe, Túrksib aýdanynyń Qaırat shaǵynaýdanynda ornalasqan bazardyń jalpy aýmaǵy 56 myń sharshy metrden asady. Buǵan deıin júrgizilgen tekserý barysynda ony «Statýs Construction» JShS ruqsat qujattarynsyz salǵany anyqtalǵan.
Menshik ıesine qatysty ákimshilik shara qabyldanyp, zańbuzýshylyqtardy joıý týraly nusqama berilgen. Alaıda nusqama talaptary oryndalmaǵandyqtan, basqarma zańsyz nysandardy buzý týraly talap aryzben Almaty qalasynyń mamandandyrylǵan aýdanaralyq ekonomıkalyq sotyna júgingen.
- Almaty qalalyq sotynyń qaýlysymen mamandandyrylǵan aýdanaralyq ekonomıkalyq sottyń zańsyz nysandardy buzý týraly sheshimi ózgerissiz qaldyryldy. Іs materıaldary sheshimdi oryndaý úshin Ádilet departamentine joldandy. Sot sheshimin oryndaý maqsatynda menshik ıesi nysandardy buzý jumystaryn óz betinshe bastady, - dep habarlady basqarmadan.
Eske salaıyq, buǵan deıin Almatyda «Baısat» bazary aýktsıonda 24 mlrd teńgege satyldy.
