Almatyda jerdiń baǵalyq aımaqtary jetiden beske deıin qysqarady
ALMATY. KAZINFORM - Almaty máslıhatynyń kezekten tys sessııasynda 2015 jyly ázirlengen jerdi baǵalyq aımaqtarǵa bólý shemasyn ózgertý máselesi qaraldy.
Almaty qalasy Jer qatynastary basqarmasynyń basshysy Gúlnar Kókobaevanyń aıtýynsha, 2014 jyly Almatyǵa Almaty oblysynyń shamamen 23,2 myń gektar aýmaǵy qosylǵan. Ol kezde bul aýmaqtarda qajetti kólik jáne ınjenerlik ınfraqurylym bolmaǵan edi. Sondyqtan olar 5, 6 jáne 7-baǵalaý aımaqtaryna engizildi.
Sońǵy 11 jylda qala aýmaǵy aıtarlyqtaı ózgerdi. Kólik jáne ınjenerlik ınfraqurylym damyp, jańa áleýmettik nysandar paıda boldy, turǵyn úı, kommýnaldyq, qoǵamdyq-iskerlik jáne kommertsııalyq aýmaqtar qalyptasty.
Bas jospardy jáne qalanyń polıortalyq damý modelin eskere otyryp, baǵalaý aımaqtarynyń sanyn 7-den 5-ke deıin qysqartý jáne olardyń shekarasyn naqtylaý usynyldy.
Jańa Salyq kodeksine baılanysty aımaqtar shekarasynyń ózgerýi aýmaqtar arasyndaǵy salyq júktemesiniń qaıta bólinýine alyp keledi. Jer ýchaskesiniń jańa aımaqqa jatqyzylýyna qaraı salyq somasy artýy, tómendeýi nemese ózgerissiz qalýy múmkin.
— Salyqtyń ózgerýi eń aldymen shekaralar naqtylanǵannan keıin naqty jer ýchaskesiniń qaı baǵalaý aımaǵyna jatqyzylatynyna baılanysty, - dep túsindirdi basqarma basshysy
Ózgerister negizinen kommertsııalyq maqsattaǵy jer ýchaskelerine qatysty bolady. Bul rette túzetý koeffıtsıentteri turǵyn úı qurylystary bar jeke turǵyn úı qurylysyna arnalǵan jer ýchaskelerine qoldanylmaıdy. Olar úshin Salyq kodeksinde belgilengen salyqty esepteýdiń jeke tártibi qoldanylady.
«Saıran» shaǵynaýdanynda salyq 1 sotyqqa 202 teńgege nemese 4% ósedi. Ermensaıda 11%, ıaǵnı 1 sotyqqa 434 teńgege artady. «Shymbulaq» taý shańǵysy kýrorty men «Medeý» sport kesheninde salyq somasy 18%-ǵa, ıaǵnı 1 sotyqqa 666 teńgege kóbeıedi.
Ekinshi aımaqta, Tóle bı, Jandosov kósheleri, Altynsarın jáne Jubanov dańǵyldary mańynda salyq júktemesi shamamen 2%-ǵa, ıaǵnı 1 sotyqqa 86 teńgege tómendeýi múmkin. Qalqaman aýdanynda 3%-ǵa (1 sotyqqa 145 teńge), taý klasterinde 10%-ǵa (1 sotyqqa 377 teńge), Almaty Arena mańynda 16%-ǵa (1 sotyqqa 579 teńge) artady.
Salyqtyń ındýstrııalyq aımaq aýmaǵynda kóp ósedi. Munda salyq 26%, ıaǵnı 1 sotyqqa 782 teńgege deıin artady.
Almaty máslıhatynyń kezekten tys sessııasynda depýtattar jerdi baǵalyq aımaqtarǵa bólý shemasyn ózgertý týraly sheshimdi bekitti.
Eske salsaq, Almatynyń 2040 jylǵa deıingi Bas josparyn túzetý kezinde turǵyndar usynysy eskerilgeni habarlandy.
