Almatyda jer silkinisine arnalǵan sımýlıatsııalyq oqý ortalyǵy ashylady
ALMATY. KAZINFORM – Almatyda 2025 jyly ǵımarattardy seısmıkalyq kúsheıtýge arnalǵan qalalyq baǵdarlama ázirlenedi.
Almaty qalasynyń 2025-2027 jyldarǵa arnalǵan bıýdjeti máslıhattyń kezekten tys sessııasynda bekitildi. Qabyldanǵan bıýdjette qalanyń seısmıkalyq qaýipsizdigin qamtamasyz etýge baǵyttalǵan sharalarǵa qarajat qarastyryldy.
Ǵımarattar men qurylystardyń seısmıkalyq qaýipsizdigin arttyrý uzaq merzimdi jáne aýqymdy qarjyny qajet etetin úderis bolǵandyqtan, bul maqsatqa shamamen 14 mlrd teńge bólý josparda tur.
– Halyqaralyq tájirıbege sáıkes, qalada nysandardyń naqty seısmoturaqtylyǵyn anyqtaý úshin tólqujattaý júrgizilýde. Osy jumystyń nátıjesinde 2025 jyly Japonııa, AQSh jáne Izraıl úlgisinde ǵımarattardy seısmıkalyq kúsheıtýge arnalǵan qalalyq baǵdarlama ázirlenip, engiziledi, - delingen habarlamada.
Almatyda áleýmettik jáne ákimshilik memlekettik ǵımarattardy seısmıkalyq kúsheıtý jumystary jyl saıyn júrgiziledi. 2025 jyly Bostandyq jáne Medeý aýdandaryndaǵy 3 mektepti seısmıkalyq kúsheıtý aıaqtalady. Sondaı-aq Túrksib aýdanyndaǵy №50 mektep-lıtseıde seısmıkalyq nyǵaıtý jumystary bastalady. Áýezov, Bostandyq jáne Medeý aýdandaryndaǵy 7 balabaqshada jumystar qolǵa alynady.
Sonymen qatar kóshkin qaýpin baǵalaý jáne kóshkin qaýpi bar ýchaskelerdiń (Kishi jáne Úlken Almaty, Qarǵaly, Aqsaı ózenderiniń basseıni) tólqujatyn jasaý úshin 168,8 mln teńge somasyna 3 jyldyq joba júzege asyrylyp jatyr.
Ulttyq seısmologııalyq baqylaý jáne zertteý ortalyǵynyń málimetinshe, Almaty aglomeratsııasyn tolyq qamtý jáne seısmologııalyq derekterdi óńdeý jyldamdyǵyn arttyrý úshin qazirgi 51 seısmostantsııaǵa qosymsha 70 stantsııa ornatý qajet. Bul 2025-2026 jyldary júzege asyrylyp, jer silkinisiniń erte eskertý júıesin jetildirýge múmkindik beredi.
Qala aýmaǵy biryńǵaı baǵdarlamalyq qamtamasyz etý arqyly jumys isteıtin seısmodatchıktermen qamtylady. Buǵan qosa, Almaty ınfraqurylymyn Qytaı, Qyrǵyzstan jáne Ózbekstan sııaqty kórshiles memleketterdiń júıelerimen ıntegratsııalaýǵa daıyndyq jumystary júrgizilmek.
– Qalanyń qaýipsizdigin arttyrý maqsatynda sımýlıatsııalyq oqý-ádistemelik ortalyqtyń qurylysy da josparlanǵan. Bul joba turǵyndardy tótenshe jaǵdaıda ózin-ózi qutqarý jáne alǵashqy medıtsınalyq kómek kórsetý daǵdylaryna úıretýge jol ashady. Ortalyq nusqaýshylary azamattarǵa qaýip-qater kezinde ózin-ózi qorǵaý jáne alǵashqy kómek kórsetý ádisterin úıretedi, - dep atap ótti máslıhattan.