Almatyda Mass Alert jer silkinisin eskertý júıesi pılottyq rejımde iske qosylady
ALMATY. KAZINFORM – Vıtse-premer Qanat Bozymbaev Almatyda seısmıkalyq qaýipsizdikti qamtamasyz etý boıynsha keńes ótkizdi.
Ǵımarattardyń seısmıkalyq turaqtylyǵyn arttyrý boıynsha qabyldanyp jatqan sharalar týraly ónerkásip jáne qurylys mınıstri Qanat Sharlapaev esep berdi. Ol seısmıkalyq deńgeıi 7-9 ball bolatyn alańdarda turǵyn úıler men áleýmettik nysandar salý kezinde seısmıkalyq oqshaýlaýdyń mindetti júıesin engizý týraly baıandady. Normatıvtik-tehnıkalyq qujattarǵa tıisti túzetýler daıyndaldy.
Qanat Bozymbaev halyqaralyq tájirıbeni, onyń ishinde japon tájirıbesin eskere otyryp, seısmıkalyq qaýipti óńirlerdegi nysandardy jobalaý kezinde normalardy qatańdatý jumystaryn júrgizýdi, sondaı-aq akkredıttelgen zerthanalardy qoldana otyryp, qurylys normalarynyń sáıkestigin qadaǵalaýdy kúsheıtýdi tapsyrdy.
Tótenshe jaǵdaı týyndaǵan sátte azamattardy ýaqtyly habardar etý maqsatynda Mass Alert júıesi bıylǵy 1 maýsymǵa deıin pılottyq rejımde engiziletin bolady.
«Mass Alert» arqyly halyqty qulaqtandyrý jelige qosymsha júkteme týdyrmaıtyn jáne bazalyq stansalardyń antennasyn jabý aımaǵyndaǵy barlyq abonentti birden jáne jappaı habardar etýge múmkindik beretin Cell Broadcast tehnologııasyn paıdalana otyryp júrgiziledi», - dedi Almaty ákimi Erbolat Dosaev.
Vıtse-premer halyqty shuǵyl habardar etý júıesin iske qosý protsesin jedeldetýdi tapsyrdy. Atalǵan júıe elimizdiń jer silkinisi qaýpi bar barlyq óńirlerinde bolýy jáne úzdiksiz jumys isteýi tıis.
Sondaı-aq Qanat Bozymbaev jer silkinisi bolǵan jaǵdaıda halyqty aqparattandyrýǵa, qutqarý jáne evakýatsııalyq is-sharalardy uıymdastyrýǵa, jyljymaly dalalyq gospıtaldardy óristetýge qatysty memlekettik organdardyń is-qımyl algorıtmin tyńdady.
Vıtse-premer TJM-ge maýsymnyń birinshi onkúndiginde «Jer» respýblıkalyq oqý-jattyǵýy barysynda algorıtmdi synaqtan ótkizýdi tapsyrdy.
Tehnıkanyń daıyndyǵy men ony basqa óńirlerden jedel tasymaldanýyna erekshe nazar aýdaryldy.
«Oqý-jattyǵý sheńberinde tartylatyn tehnıkalardyń jaǵdaıyna jáne onyń qoıylǵan mindetterge sáıkestigin tekserý qajet. Sondaı-aq, tótenshe jaǵdaı zardaptaryn joıýǵa jekemenshik uıymdardyń tehnıkasyn tartý máselesin qarastyrý qajet», - dep atap ótti vıtse-premer.
Keńes qorytyndysy boıynsha tıisti vedomstvolarǵa elimizdegi seısmıkalyq ahýalǵa turaqty monıtorıng júrgizý jáne jer silkinisi týyndaǵan jaǵdaıda turǵyndardyń is-áreketterin pysyqtaý boıynsha oqý-jattyǵýlardy turaqty túrde ótkizý tapsyryldy.
