Almatyda jer silkinse, qala daıyn ba
ALMATY. KAZINFORM — Almatyda tótenshe jaǵdaıǵa daıyndyq qaǵaz júzinde emes, is júzinde tekseriledi.
Premer-mınıstrdiń orynbasary Qanat Bozymbaev Almatyǵa jumys sapary barysynda azamattyq qorǵaý nysandaryn aralap, seısmologııalyq monıtorıng jáne halyqty qulaqtandyrý júıeleriniń jumysymen tanysty. Sondaı-aq seısmıkalyq qaýipsizdik máseleleri boıynsha keńes ótkizdi.
QR Tótenshe jaǵdaılar mınıstrliginiń «Alataý» jedel maqsattaǵy Ońtústik bazasynda vıtse-premer qutqarý bólimsheleri men № 21 mamandandyrylǵan órt sóndirý bóliminiń tótenshe jaǵdaılarǵa daıyndyǵyn tekserdi.
— Kelesi jyly barlyq kúshter men quraldardy jumyldyra otyryp, aýqymdy komandalyq-shtabtyq oqý-jattyǵýlar ótkizý qajet. Bólimshelerdiń naqty jasaqtalýyn jáne tótenshe jaǵdaılarǵa den qoıýǵa daıyndyǵyn tek qaǵaz júzinde emes, is júzinde tekserý mańyzdy, — dedi Qanat Bozymbaev.
«Medeý» seısmologııalyq stantsııasynda vıtse-premerge jer silkinisterin baqylaýǵa arnalǵan jabdyqtar men erte habarlaý júıesi tanystyryldy.
Sonymen qatar Qanat Bozymbaev Seısmologııalyq baıqaý jáne zertteýler ulttyq ǵylymı ortalyǵyna bardy. Onyń bazasynda ǵylymı zertteýler júrgizý, seısmologııalyq derekter almasý jáne erte eskertý júıelerin jetildirý maqsatynda birlesken qazaqstandyq-qytaılyq ortalyq qurý josparlanyp otyr.
Almaty qalasynyń Tótenshe jaǵdaılar departamentinde azamattyq qorǵaý kúshteriniń daıyndyǵy qaraldy. Vıtse-premer sondaı-aq 103,6 myńnan astam ótinish qabyldaǵan 109 biryńǵaı baılanys ortalyǵynyń jumysymen jáne № 105 mektep-gımnazııa bazasynda ornalasqan zardap shekken halyqty qabyldaý pýnktimen tanysty.
Qalada barlyǵy osyndaı 384 pýnkt qarastyrylǵan, onyń 150-i mobıldi qoımalarmen jabdyqtalǵan.
Nysandardy aralaý qorytyndysy boıynsha Qanat Bozymbaev Almaty qalasynyń ákimdiginde seısmıkalyq qaýipsizdik máseleleri jóninde keńes ótkizdi. Oǵan qala ákimi Darhan Satybaldy men salalyq mınıstrlikterdiń ókilderi qatysty.
Keńeste Qazaqstan aýmaǵynyń shamamen 40%-y seısmıkalyq qaýipti aımaqtarǵa jatatyny atap ótildi. Jyl basynan beri 1 myńnan astam jer silkinisi tirkelgen, onyń segizi 2–4 ball deńgeıinde sezilgen.
— Seısmıkalyq qaýipti boljaý máselesinde zamanaýı tásilder qajet. Bul jumysqa tsıfrlyq quraldardy belsendi túrde engizý kerek, — dep atap ótti Qanat Bozymbaev.
Vıtse-premer ǵımarattardyń seısmıkalyq tózimdiligine baqylaýdy kúsheıtýdi, seısmıkalyq qaýipti óńirlerdegi nysandardy tekserýdi jáne qaýip-qaterlerdiń tsıfrlyq derekqoryn qalyptastyrýdy tapsyrdy. Sondaı-aq tektonıkalyq jarylymdar aımaqtary men taý bókterindegi aýdandarda qurylys salýǵa tyıym salý qajettigin atap ótti.
TJM-ge múddeli memlekettik organdarmen birlesip seısmologııalyq monıtorıng júıesin jetildirý, «Mass Alert» júıesin engizýdi aıaqtaý jáne halyqtyń jer silkinisine daıyndyǵyn kúsheıtý tapsyryldy.
Budan bólek, Túrkistan, Mańǵystaý oblystary men Taraz qalasynyń seısmıkalyq aýdandastyrý kartalaryn ázirleýdi qarjylandyrý máselesin pysyqtaý, sondaı-aq jer silkinisterin zertteý jónindegi qazaqstandyq-qytaılyq ortalyqty qurý jumysyn jandandyrý qajet.
Buǵan deıin Almatyda jer silkinisiniń kúshi 4 balǵa jýyqtaǵanyn jazǵanbyz.
