Almatyda jer silkinisi kezinde sırena qosylmasa da, qalaı áreket etý kerektigi habarlanýǵa tıis edi — TJM
ASTANA. KAZINFORM — Tótenshe jaǵdaılar mınıstriniń keńesshisi Talǵat Nurmaǵambetov Almatydaǵy jer silkinisi kezinde ketken kemshilikterdi atady.
«23 qańtardaǵy oqıǵalar bizdiń mınıstrlikke ońaı tıgen joq. Memleket basshysy baǵa bergendeı, azamattyq qorǵanys bólimsheleri qoıylǵan mindetti atqara almady. Aıtylǵan syn qatań ári ádiletti boldy. Mınıstrdiń uıǵarymy boıynsha, osyndaı jaǵdaıǵa ákelgen sebepterdi anyqtaý úshin ortalyq apparattan Almatyǵa arnaıy top jiberildi. Tekserý qorytyndysy boıynsha mınıstrimiz ásirese Almaty sııaqty megapolıste mundaı jaǵdaıǵa endi jol bermeý jáne tártiptik jazaǵa tartý týraly akt jasady. Negizgi sebepterine kelsek, halyqty qulaqtandyrý júıesi habarlaýǵa qabiletti bolǵanyna qaramastan uıymdastyrý jáne basqarý jumysynyń álsizdigin aıtýǵa bolady», — dedi ol.
Onyń sózinshe, qazirgi tańda dybystap qulaqtandyrý qondyrǵysy Almatyny 100% qamtyp tur.
«Biraq ondaı qondyrǵymen jer silkine qalǵan kezde qandaı áreket bolý kerektigi sııaqty qajetti aqparat qana berilýi kerek. Ókinishke qaraı, sırena dabylyn qospaý týraly sheshim qabyldanǵan kezde halyqqa ne isteý kerektigin túsindirý habary dybystap taratylýy kerek bolǵan. Tótenshe jaǵdaılar departamenti olaı istemegen. Ol jaıynda aıtyldy. Taǵy qaıtalap aıtaıyn, jańa qulaqtandyrý qondyrǵysy synaqtan ótkizilip jatyr. Ol jer silkine bastasa avtomatty túrde halyqty qulaqtandyra alady. Synaq onyń jumys isteıtinin kórsetti», — dedi mınıstr keńesshisi.
Sondaı-aq, ol zardap shekken halyqty toptastyrýǵa aıtylǵan syn men eskertý oryndy ekenin atap ótti.
«Bul baǵytta da uıymdastyrý jumysy júrgiziledi. Tekserý adam qabyldaıtyn oryndardyń ákimshilikteri mundaı jaǵdaıǵa daıyn emes ekenin kórsetti. Keıbiri jabyq jatsa, keıbiri pana izdegen halyqty kirgizbeı qoıǵan. Ol baǵytta da tıisti jumys júrgiziledi. Jekelegen basshylarǵa tártiptik jaza qoldanylady», — dedi Talǵat Nurmaǵambetov.
