Almatyda jer silkinisi qaıtalanýy múmkin be

ALMATY. KAZINFORM — Almaty tótenshe jaǵdaılar departamenti ókilderi qalada tirkelgen jer silkinisine qatysty túsinik berdi.

Qazir ǵylymı seısmologııalyq ortalyq komıssııasy jınalyp, jaǵdaıdy talqylap jatyr.

— Seısmologtar komıssııa qorytyndysynan keıin naqty boljamdy jarııalaıdy, — dep málimdedi qalalyq tótenshe jaǵdaılar departamenti.

Saǵat 13:10–daǵy jaǵdaı boıynsha polıtsııa departamentiniń patrýldik kólikteri men órt sóndirý bólimderiniń arnaıy tehnıkalary qala aýmaǵyn aralap tekserý jumystaryn júrgizip jatyr. Gıdrobeket baqylaýshylary jáne ınjenerlik-tehnıkalyq mamandar algorıtmge sáıkes ózen arnalaryn jáne nysandaryn tekserip júr.

TJM-niń «Qazseldenqorǵaý» memlekettik mekemesiniń mamandary ózen arnalarynyń, gıdrotehnıkalyq qurylymdardyń, sondaı-aq kóshkin jáne sel qaýpi bar aımaqtardy baqylaýǵa alǵan.

Sonymen qatar turǵyndardy qamtamasyz etetin ınfraqurylym nysandarynyń zaqymdanǵany-zaqymdanbaǵanyn anyqtaý úshin vızýaldy tekseris qolǵa alyndy. Qazirgi ýaqytta atalǵan nysandar qalypty jumys istep tur.

Zardap shekkender nemese qıraǵan ǵımarattar týraly aqparat túsken joq.

Sonymen qatar jer silkinisine baılanysty halyqqa jedel psıhologııalyq kómek kórsetý maqsatynda «senim telefony» jumys istep tur:
• 8 (727) 278 20 83;
• 8 (727) 278 20 84.

Eske salaıyq, Almatyda búgin, 4 jeltoqsanda jer silkindi.

Jer asty dúmpýiniń oshaǵy Almatydan ońtústik-shyǵysqa qaraı 277 shaqyrym qashyqtyqta, Qytaı aýmaǵynda ornalasqan. Almatyda dúmpýler MSK-64 shkalasy boıynsha 3 ball deńgeıinde sezildi.