Almatyda jer silkinetini der kezinde eskertilmeýine Nuráli Álıevtiń qatysy bar ma – Antıkor jaýaby

ASTANA. KAZINFORM – Almatydaǵy jer silkinisterin aldyn ala eskertý júıesin ornatýǵa jaýapty bolǵan merdigerdiń Nuráli Álıevpen qandaı qatysy bar? Sybaılas jemqorlyqqa qarsy is-qımyl agenttiginiń kezekti brıfınginde vedomstvonyń resmı ókili Arman Tileýkenovke osyndaı suraq qoıyldy.

«Biz ol aqparattan habardarmyz. Sondaı-aq, áriptesimiz, qoǵamdyq keńes múshesi Dıdar Smaǵulovtyń áleýmettik jelidegi jazbasyn oqydyq. Bul fakti boıynsha «Ádildik joly» qoǵamdyq birlestiginiń aryzyn Sybaılas jemqorlyqqa qarsy is-qımyl agenttiginiń Almaty qalasy boıynsha departamenti tirkedi», - dedi Arman Tileýkenov.

Sondaı-aq, ol «Ádildik joly» joldaǵan hat boıynsha tekserý júrgiziletinin atap ótti.

«Materıaldar ókiletti organǵa tekserý júrgizý úshin joldandy. Sol tekserýdiń qorytyndysy boıynsha tıisti protsessýaldyq sheshim qabyldanyp, BAQ pen qoǵamǵa habarlanady», - dedi agenttiktiń resmı ókili.

Eske salaıyq, «Ádildik jol» qoǵamdyq birlestiginiń jetekshisi Dıdar Smaǵulov áleýmettik jelide Almatydaǵy jer silkinisterin aldyn ala qulaqtandyratyn júıeni ornatý úshin 1,1 mlrd teńge jumsaǵan merdiger kompanııanyń artynda eks-prezıdenttiń jıeni Nuráli Álıev turǵanyn jazǵan edi.