Almatyda jer silkindi
ALMATY. KAZINFORM — Búgin, 2026 jylǵy 4 maýsymda saǵat 21:22–de Almaty turǵyndary jer asty dúmpýin sezdi.
Qala turǵyndarynyń aıtýynsha, jer silkinisi birneshe sekýndqa sozylǵan. Áleýmettik jelilerde almatylyqtar dúmpýdiń kópqabatty turǵyn úılerde anyq sezilgenin jazyp jatyr. Alaıda jer silkinisi kezinde turǵyndardyń uıaly telefondaryna tótenshe jaǵdaı týraly habarlama kelmegen.
Tótenshe jaǵdaılar mınıstrliginiń málimetinshe, seısmologııalyq baqylaý jáne zertteý ulttyq ǵylymı ortalyǵynyń seısmıkalyq stantsııalarynyń jelisindegi aqparat óńdelip, epıtsentr pen kúshi týraly málimet naqtylanyp jatyr.
— Ózara is-qımyl algorıtmine sáıkes tıisti memlekettik organdarǵa habarlandy, polıtsııa departamentiniń jedel kezekshisine aqparat jetkizildi, — delingen habarlamada.
Eske salaıyq, buǵan deıin seısmologtar Qyrǵyzstan aýmaǵynda 5,0 magnıtýdaly jer silkinisin tirkegenin habarlaǵan edik.
QR TJM «SBZUǴO» JShS seısmıkalyq stantsııalar jelisi jer asty dúmpýi 2026 jylǵy 4 maýsymda Astana ýaqyty boıynsha 21:19–da tirkelgenin naqtylady.
Jer silkinisi oshaǵy Qazaqstan aýmaǵynda Almatydan soltústik-shyǵysqa qaraı 316 shaqyrym jerde ornalasqan.
Jer silkinisiniń koordınattary: 44.547 s. e. 80.405 sh. b. Tereńdigi — 30 shaqyrym. Jer silkinisiniń sezilýi (MSK-64 shkalasy boıynsha):
Jer asty dúmpýi Jarkent qalasynda kóbirek sezilgen — 4 ball.
Al Sarqan, Jansúgirov, Tekeli jáne Shonjy eldi mekenderinde — 3 ball.
Almatyda jer silkinisiniń eseptik qarqyndylyǵy 2 ball boldy. Sondaı-aq dúmpýler Taldyqorǵan, Qonaev, Talǵar, Esik, Úsharal, Úshtóbe, Saryózek, Kegen, Narynqol, Úrjar jáne basqa da eldi mekenderde sezildi.
