Almatyda Jeńis kúnine oraı 15 ardagerge birjolǵy tólem berildi
ALMATY. KAZINFORM – Almatyda UOS ardagerleri men olarǵa teńestirilgen tulǵalarǵa Jeńis kúnine oraı materıaldyq kómek kórsetildi.
Qala ákimdiginiń málimetinshe, Almatyda Uly Otan soǵysynyń 15 ardagerine Jeńis kúnine oraı 5 mln teńge kóleminde birjolǵy tólem jasaldy. Sondaı-aq 1969 jyly naýryzda Damanskıı araly mańyndaǵy jáne 1969 jyly tamyzda Jalańashkól kóli aýdanyndaǵy áskerı qımyldarǵa qatysqan 17 adamǵa 200 myń teńgeden materıaldyq kómek tólendi.
- 100 myń teńgeden UOS ardagerlerine teńestirilgen 1353 tulǵa, basqa memleketter aýmaǵyndaǵy áskerı qımyldarǵa qatysqan 2955 ardager, sondaı-aq soǵys jyldaryndaǵy janqııar eńbegi úshin ordender men medaldarmen marapattalǵan 4713 tyl eńbekkeri aldy, - dep habarlady ákimdikten.
Sonymen qatar qaıtys bolǵan UOS ardagerleriniń 191 jubaıyna 50 myń teńgeden tólem berilgen.
Materıaldyq kómek Almaty qalasy boıynsha «Azamattarǵa arnalǵan úkimet» memlekettik korporatsııasynyń tizimderi negizinde ótinishsiz tólendi.
Eske salaıyq, buǵan deıin Qyrǵyzstanda ardagerlerge beriletin birjolǵy tólem somasy belgili boldy.
