Almatyda jeńil kólik avtobýsqa soǵylyp, bir adam qaza tapty

ALMATY. KAZINFORM – Almatyda jeńil kólik pen jolaýshylar avtobýsy soqtyǵysty. Apat saldarynan bir adam qaza taýyp, tórt adam jaraqat aldy.

Onyń vıdeosy áleýmettik jelide tarady. 

Almaty qalalyq polıtsııa departamentiniń málimetinshe, jol apaty 27 qańtar tańǵy saǵat 09:00–de Alataý aýdanynda bolǵan. 

Chevrolet avtokóliginiń júrgizýshisi, 2003 jyly týǵan azamat I. Emtsov kóshesimen soltústik baǵytta kele jatyp, rýlge ıe bola almaı, qarsy baǵytqa shyǵyp ketken de, avtobýspen soqtyǵysqan. 

«Oqıǵa saldarynan jeńil mashına júrgizýshisi oqıǵa ornynda kóz jumdy. Avtobýstyń tórt jolaýshysy medıtsınalyq kómekke júgindi», — dep habarlady Almaty qalalyq polıtsııa departamentiniń baspasóz qyzmeti.

Atalǵan derek QR Qylmystyq kodeksiniń 345-babynyń 3-bóligi boıynsha sotqa deıingi tergep-tekserýdiń biryńǵaı tizilimine tirkeldi.

Tıisti saraptamalar taǵaıyndaldy.