Almatyda jemqorlyqqa qarsy mýral paıda boldy
ALMATY. KAZINFORM – Almatyda jemqorlyqqa qarsy kúres taqyrybynda «Adal urpaq – jemqorlyqsyz bolashaq» atty mýral paıda boldy.
Mýral jastar saıasaty basqarmasynyń qoldaýymen, Sybaılas jemqorlyqqa qarsy volonterlik joba aıasynda salyndy. Alataý aýdany, Zerdeli shaǵyn aýdanyndaǵy kópqabatty turǵyn úıdiń qasbetindegi art-nysan jastardy adaldyq pen ádilettilikke jáne sybaılas jemqorlyqtan bas tartýǵa úndeıdi.
– Mýral jobasynyń maqsaty — el bolashaǵy sanalatyn jastarǵa baǵyttalǵan tárbıelik, kórkem ári azamattyq úndeý. Onda eńbek adamy – dáriger, qurylysshy, polıtsııa qyzmetkeri beınelenip, adal eńbektiń qoǵamdaǵy mańyzyn kórsetý kózdelgen. Bul Memleket basshysy jarııalaǵan «Jumysshy mamandyqtar jyly» aıasyndaǵy «Zań men tártip» qaǵıdatyna sáıkes, turaqty damý negizin nasıhattaıdy, – deıdi Almaty qalasy Jastar saıasaty basqarmasy basshysynyń orynbasary Almaz Kenesbaı.
Sybaılas jemqorlyqqa qarsy volonterlik jobanyń jetekshisi Ákejan Kenesovtyń sózinshe, volonterlik jobaǵa 300-ge jýyq jas belsendi qatysyp jatyr.
Olar memlekettik satyp alý protsesteri men qurylys nysandarynda ashyqtyqty qamtamasyz etý maqsatynda qoǵamdyq baqylaý júrgizip, quqyqtyq jáne mádenı saýattylyqty arttyrý baǵytyndaǵy is-sharalarǵa uıytqy bolady.
Osyǵan deıin Astanada «Ulttyq ulan — el aıbyny» patrıottyq muraly ashylǵan bolatyn.
Sondaı-aq Qonaev qalasynda eńbek adamdaryna arnalǵan mýraldar paıda bolǵan edi.