Almatyda Jeltoqsan kóshesi boıymen BRT jelisiniń qurylysy bastalady
ALMATY. KAZINFORM – Almatyda BRT jelisi Tımırıazev kóshesinen Raıymbek batyr dańǵylyna deıin uzartylady.
Almaty ákimdiginen málim etkendeı, uzyndyǵy 4,6 shaqyrym bolatyn BRT jelisiniń qurylysy Jeltoqsan kóshesinde bastalady.
Bul jańa joǵary jyldamdyqtaǵy avtobýs jolaǵy Tımırıazev kóshesi boıyndaǵy jumys istep turǵan BRT jelisin Raıymbek batyr dańǵylynda salynyp jatqan jańa jelimen baılanystyrady.
Kólik keptelisi men avtoturaqqa baılanysty týyndaǵan jaıtty sheshý úshin BRT jolaǵy joldyń shetimen salynady. ıAǵnı, soltústik baǵytta – joldyń oń jaǵymen, al ońtústik baǵytta – sol jaǵymen ótedi. Jeke avtokólik qozǵalysy úshin Abaı dańǵylynan soltústikke qaraı birjaqty qozǵalys pen jolaqtar sany saqtalady.
Qurylys qalaı júrgiziledi
Qurylysta eshqandaı ǵımaratty buzý jáne joldy keńeıtý qarastyrylmaǵan. Avtobýs aıaldamalary múmkindigi shekteýli jandar úshin qoljetimdilikti eskere otyryp, arnaıy platformada ornalastyrylady. Joba aıasynda baǵdarsham nysandaryn jańartý, kóshe jaryǵyn jetildirý, trotýarlardy plıtkamen qaptaý arqyly jaıaý júrginshiler bóligin jańartý kózdelgen.
Jumys 26 sáýirde bastalady. Alǵashqy kezeńde ınjenerlik kommýnıkatsııa, jıektastar men aryq júıeleri qaıta ornalastyrylady. Bul jumystar joldyń shetinde, kólik qozǵalysyn shektemeı júrgiziledi.
Maýsymda jańa asfalt tóselip, jol tańbalary syzylady. Jol jamylǵysy tolyqtaı jańartylyp, qozǵalys 36 saǵatqa deıin ishinara shekteledi. Aınalma joldar men ýaqyty aldyn ala habarlanady.
Jobany aıaqtaý osy jyldyń sońyna josparlanǵan.
Jumys kezinde jaıaý júrginshiler úshin qandaı jaıly jaǵdaı jasalady
Jaıaý júrginshiler ınfraqurylymyn jańartý kezinde jóndeletin ýchaskelerdiń boıynda aınalma joldar, arnaıy qorshaýlar, pandýstar jáne jaryq shaǵylystyratyn elementter ornatylady.
Kútiletin nátıje qandaı
Jobanyń maqsaty — Tımırıazev kóshesindegi qoldanystaǵy BRT jelisin Raıymbek batyr dańǵylyndaǵy salynyp jatqan jelimen biriktirý. Sonyń nátıjesinde BRT jelisi shyǵys-batys qana emes, ońtústik-soltústik baǵytyndaǵy kólik baılanysyn da arttyrady. Jeltoqsan kóshesindegi avtobýstardyń ortasha jyldamdyǵy 40%-ǵa, al jolaýshylar legi 30%-ǵa artpaq.
Jańalyqtardy qaıdan bilýge bolady
Qolǵa alynǵan jumystar, kólik qozǵalysyndaǵy ózgerister týraly aqparat turaqty túrde Almaty_Joly Telegram arnasy, qala ákimdiginiń áleýmettik jelileri, sondaı-aq, 2GIS pen ıAndeks kartalary servısteri arqyly jarııalanyp otyrady.
Buǵan deıin Raıymbek dańǵylynda BRT qurylysy bastalǵany týraly jazǵan edik.