Almatyda jekemenshik mektep lıtsenzııasyna qatysty daý týyndady

ALMATY. KAZINFORM – Almaty qalasynda Oqý-aǵartý mınıstrliginiń óńirlik departamenti jekemenshik mektepke qatysty jospardan tys tekserý júrgizip jatyr. 

Áleýmettik jelide Almatydaǵy Baiterek Science & Technology School mektebi 1,5 aıdan beri lıtsenzııasyz jumys istep kele jatqany týraly aqparat tarady. 

Almaty qalasynyń bilim salasynda sapany qamtamasyz etý departamenti bul mektepke qatysty tekserý júrgizilip jatqanyn rastady.

– Qazirgi ýaqytta Almaty qalasynyń bilim salasynda sapany qamtamasyz etý departamenti «Baiterek School of Science and Technology» JShS-ine qatysty lıtsenzııasyz bilim berý qyzmetin júzege asyrý faktisi boıynsha jospardan tys tekserý júrgizip jatyr. Onyń qorytyndysy boıynsha tıisti sharalar qabyldanady, - dep málimdedi Oqý-aǵartý mınıstrliginiń departamenti.

Vedomstvo zań boıynsha bilim berý qyzmeti mindetti túrde lıtsenzııa berilgennen keıin bastalýy tıis ekenin málimdedi.

– «Ruqsattar men habarlamalar týraly» zańnamaǵa jáne Qazaqstan Respýblıkasynyń «Bilim týraly» zańynyń 40-babyna sáıkes, bilim berý qyzmeti mindetti túrde lıtsenzııalanýǵa jatady. Oqytý qyzmetin lıtsenzııasyz júrgizý – zań buzýshylyqqa jatady jáne ákimshilik jaýapkershilikke ákeledi, - dep habarlady departamentten.

Eske salaıyq, buǵan deıin jekemenshik mektepterdiń taǵdyryn jergilikti máslıhattar sheshetinin jazǵanbyz.