Almatyda jeke úıdi qalaı gazǵa qosýǵa bolady jáne qyzmet quny qansha
ALMATY. KAZINFORM — Almatyda gazdandyrý deńgeıi 99,6%-ǵa jetti. Degenmen qalada jańa qubyr salynǵanǵa deıin tabıǵı gazǵa qosyla almaıtyn úıler áli bar.
«QazaqGazAimaq» AQ Almaty óndiristik bólimshesiniń málimetinshe, aldaǵy jyldary gaz ınfraqurylymyn keńeıtý josparlanyp otyr. Atap aıtqanda, 191 turǵyn úıdi gazǵa qosýǵa tehnıkalyq múmkindik jasalmaq. Ol úshin shamamen 10,7 shaqyrym gaz jelisi salynady.
— 2027–2031 jylǵa arnalǵan ınvestıtsııalyq baǵdarlama aıasynda shamamen 191 turǵyn úıdi gazǵa qosýǵa tehnıkalyq múmkindik jasalady. Ol úshin shamamen 10,7 shaqyrym gaz taratatyn jeli salý qajet. Mekenjaılar tizimi turǵyndardyń ótinishi men jergilikti atqarýshy organdardyń málimeti boıynsha jasaldy. Bul jumysty qarjylandyrý da ınvestıtsııalyq baǵdarlama aıasynda qarastyrylyp qoıylǵan, — dedi «QazaqGaz Aimaq» AQ Almaty óndiristik bólimshesi Óndiristik-tehnıkalyq bóliminiń bastyǵy Aıbek Qasymov.
Alaıda ol úıdiń janynda gaz qubyry salynǵanymen, ony úıge kirgizý turǵyndardyń jaýapkershiliginde ekenin atap ótti. Ol úshin úıdiń menshik ıesi tehnıkalyq shartty alyp, jobany ázirletip, qurylys-montaj jumysyn júrgizýi kerek.
Gazǵa qosylý quny qansha
Aıbek Qasymov jeke úıge gaz kirgizý qansha bolady degen suraqqa da jaýap berdi. Onyń sózinshe, Almatyda gazǵa qosylýdyń biryńǵaı tarıfi joq. Sondyqtan aýmaǵy birdeı eki úıdiń ózinde soma ártúrli bolýy múmkin. Jumys quny onyń qıyndyǵyna, gaz jelisin jol nemese basqa da ınjenerlik kommýnıkatsııa arqyly júrgizý qajettiligine, jabdyqtardyń baǵasyna, jerdi qazý men keıin qalpyna keltirýge baılanysty bolady.
— Turǵyndar birneshe qyzmetti tegin ala alady. «QazaqGaz Aimaq» AQ-nyń Almaty fılıaly tehnıkalyq sharttardy bergeni úshin aqy almaıdy. Qoldanystaǵy gaz taratý jelisine bastapqy qosý men gazdy alǵashqy ret iske qosý da tegin júrgiziledi, — dep atap ótti ol.
Al «QazaqGaz Aimaq» AQ Almatylyq óndiristik bólemshesiniń satý men gazben jabdyqtaý rejımi qyzmetiniń bastyǵy Narıman Hasenov gazǵa qosylý jumysynyń bir bóligin onlaın isteýge bolatynyn aıtty.
— Tehnıkalyq shartty eGov nemese eGov mobile qosymshasy arqyly onlaın alýǵa bolady, bul qyzmet tegin. Odan keıin menshik ıesi jobany ázirleıtin, qajetti jumysty júrgizetin mamandanǵan uıymdy tańdaıdy. Búkil protsesti tolyq «bir tereze» qaǵıdaty boıynsha ótý múmkin emes, biraq qazir rásimniń bir bóligin elektrondyq formatqa kóshirdik, — dedi Narıman Hasenov.
Úı janynda gaz qubyry bolsa da, biraq túrli sebeppen oǵan qosylmaǵan turǵyndar da bar. «QazaqGaz Aimaq» ókilderi mundaı úılerdiń sany belgisiz ekenin habarlady. Sebebi kompanııanyń Almatyda gazdandyrylmaǵan úılerdiń barlyǵyn qamtıtyn biryńǵaı bazasy joq.
Mamandar gaz qubyryna óz betinshe qosylýǵa qatań tyıym salynatynyn da eske salady. Tehnıkalyq sharttar alynǵannan keıin jobalaý men montaj jumysyn qajetti ruqsaty men lıtsenzııasy bar uıymdar júrgizýi tıis. Ár úıdi gazǵa qosý merzimi de jeke belgilenedi. Tehnıkalyq sharttar berilgennen keıin joba ázirlenip, montaj jumysy men qabyldaý rásimi júrgiziledi. Osydan keıin ǵana gazdy alǵash ret iske qosýǵa bolady.
Eske salaıyq, Shymkentte 1500-den astam úı men birqatar nysan gazsyz qaldy.
