Almatyda jeke turǵyn úıler qashan tegis gazben qamtylady
ALMATY. KAZINFORM – Almatyda 2027 jylǵa qaraı jeke turǵyn úıler 100% tabıǵı gazben qamtylady. Al 2028 jylǵa qaraı qalalyq baǵyttarda ekologııalyq taza qoǵamdyq kólikke tolyq kóshý josparlanǵan.
Almaty ákimi Darhan Satybaldynyń aıtýynsha, 2026 jyldyń sońyna deıin 2-JEO-ni tabıǵı gazǵa kóshirý jumystary aıaqtalady. Kelesi kezeńde bý-gaz tehnologııasyn engize otyryp, 3-JEO-ti qaıta jańǵyrtý josparlanǵan. Bul jylý kózderinen shyǵatyn zııandy zattar kólemin 92%-ǵa deıin azaıtýǵa múmkindik beredi.
– Biz qaldyqtardy basqarý júıesin jetildirip, polıgondarda kómý tájirıbesinen tereń óńdeý men energııa óndirý arqyly kádege jaratýǵa kóshemiz. Almatyda qaldyqtardy basqarý salasy kómý tásilinen tereń óńdeý jáne energetıkalyq kádege jaratýǵa kezeń-kezeńimen aýysyp jatyr. Jylyna 80 myń tonnaǵa deıin plastık óńdeıtin jáne jylyna 150 myń tonna makýlatýrany óńdeıtin zaýyttar salý josparlanǵan. Qaıta óńdeýge jaramsyz qaldyqtar energııa óndirý úshin jaǵylady. Ol úshin táýligine 2 myń tonna qaldyqty órteıtin qoqys jaǵý zaýytyn salý kózdelip otyr. Atalǵan sharalardy iske asyrý 2030 jylǵa qaraı kommýnaldyq qaldyqtardy óńdeý jáne kádege jaratý úlesin 37% paıyzǵa deıin arttyrýǵa múmkindik beredi, - dedi Darhan Satybaldy Ortalyq kommýnıkatsııalar qyzmetinde ótken brıfıngide.
Eske salaıyq, buǵan deıin Almatyda qaldyqty energııaǵa aınaldyratyn alǵashqy zaýyt jobasy qaı satyda ekenin jazǵanbyz.