Almatyda jeke ınvestıtsııaǵa salynǵan 1350 oryndyq mektepte 300 jumys orny ashyldy
ALMATY. KAZINFORM — Almaty ákimi Erbolat Dosaev 2018 jyly 8,9 mlrd teńge bolatyn jeke ınvestıtsııa esebinen salynǵan New Generation School (NGS) mektebinde bardy.
Oqý orny eki ǵımarattan turady. Birinshisi 2018 jyly salynǵan, onda primary jáne middle school (bastaýysh jáne orta mektep) ornalasqan. 2023 jyly ınvestıtsııa kólemi 4 mlrd teńge bolatyn jańa High School (joǵary mektep) ǵımaraty ashyldy.
Qala ákimi kovorkıng ortalyqty, akt zalyn, oqý kabınetteri men robototehnıka synybyn, ashana men kitaphanany aralap, zerthana, hımııa, fızıka, matematıka mamandandyrylǵan kabınetteriniń, sondaı-aq sport jáne trenajer zaldarynyń, basseın men art-alańnyń jumysymen tanysty.
Erbolat Dosaev oqýshylarmen jáne pedagogtarmen áńgimelesti, balalardy oqytý men tulǵalyq damytý ádistemesimen tanysty, qalanyń basqa mektepteri úshin úlgi bola alatyn oqý úderisiniń joǵary uıymdastyrylǵanyn atady.
Sondaı-aq, qala ákimi túlekterge oqýda, shyǵarmashylyq jolynda tabys tilep, muǵalimderdiń eńbegine alǵys aıtyp, tilekter kitabyna jazba qaldyrdy.
«Biz „mekteptegi mektep“ qaǵıdaty boıynsha jumys isteımiz, ıaǵnı balalar osynda oqyp, úı tapsyrmasyn oryndaıdy, túrli úıirme men sektsııaǵa qatysady. Balalar júzýmen aınalysady, boksqa barady, fýtbol oınaıdy, sýret salady», — dedi bastaýysh mektep dırektory Rýfına Hısamýtdınova.
Mektep aýmaǵyna adamnyń bıometrııasy fýnktsııasy bar ótkizý júıesi arqyly kirýge bolady, bóten adam kire almaıdy, 200-den astam beınebaqylaý kamerasy ornatylǵan.
Seısmıkalyq jattyǵýlar turaqty túrde ótkizilip, balalar tótenshe jaǵdaılar kezinde is-áreketin pysyqtaıdy.
Búginde aýmaqta oqýshylardyń damýy men shyǵarmashylyǵy úshin jalpy aýdany 20 myń sharshy metrden asatyn eki oqý ǵımaraty ornalasqan.
Mektep 0-11 synyp oqýshylary úshin 1350 oryn eseptelgen, 300-den astam jumys orny qurylǵan.
Sóz sońynda Erbolat Dosaev ákimdik Almatydaǵy mekteptiń bilim berý júıesine jeke ınvestıtsııa tartýdy qoldaıtynyn jetkizdi.
Jalpy, búginde megapolıste 122 jekemenshik mektep bar, onda 35 689 bala oqıdy.
2022-2023 jyldary 5539 oryndyq 22 jekemenshik mektep ashyldy.
