Almatyda jedel járdem kóligine jol bermegen júrgizýshi jaýapqa tartyldy
ALMATY. KAZINFORM - Júrgizýshi Ákimshilik Kodekstiń 598-baby 1-bóliginiń talaptaryn buzǵan.
Áleýmettik jelide jeńil kóliktiń jedel járdem kóligine jol bermegen beınejazbasy tarady.
Polıtsııa departamentiniń málimetinshe, oqıǵa 22 sáýir kúni saǵat 15:30-da Trýdovaıa jáne Áshimov kósheleriniń qıylysynda bolǵan.
- Toyota kóliginiń júrgizýshisi arnaıy shamdary qosylyp turǵan jedel járdem kóligine jol bermeı, Qazaqstan Respýblıkasynyń Ákimshilik quqyq buzýshylyq týraly Kodeksiniń 598-babynyń 1-bóliginiń talaptaryn buzǵan. Jergilikti polıtsııa qyzmetkerleri áıeldi ákimshilik jaýapkershilikke tartty. Oǵan qatysty aldyn alý, túsindirý jumystary júrgizildi, - dep habarlady departamentten.
Qalalyq polıtsııa jedel tapsyrmalardy oryndaıtyn kólikterge qatysty júrgizý tártibin saqtaý tek zań talaby ǵana emes, adam ómiriniń máselesi ekenin eskertti.
Eske salaıyq, buǵan deıin Almatyda nómirsiz júrgen 70-ten astam júrgizýshi jazalanǵanyn jazǵanbyz.