Almatyda jedel járdem qyzmetkerin urǵan adamdardyń ústinen is qozǵaldy
ALMATY. KAZINFORM – Almatyda shaqyrtýǵa kelgen jedel járdem qyzmetkerlerin úı ıesi uryp, páterinen shyǵarmaı qoıǵan. Feldsher bolǵan oqıǵany vıdeoǵa túsirip, áleýmettik jelidegi paraqshalarda bólisken.
Qoǵamdyq densaýlyq saqtaý basqarmasy baspasóz qyzmetiniń málimetinshe, oqıǵa 21 mamyr kúni tańǵy ýaqytta bolǵan. Shaqyrtýǵa barǵan aq halattylar naýqastyń jaǵdaıyn tekserip, aýrýhanaǵa barýdyń qajeti joq ekenin túsindirgen.
Alaıda mas kúıde bolǵan úı ıesi páteriniń esigin ishten qulyptap, jedel járdem qyzmetkerlerine qol jumsaǵan.
- 21 mamyr kúni saǵat 07:23 shamasynda 103-ke shaqyrý kelip túsken jáne ol boıynsha №4 qosalqy stantsııanyń jedel járdem brıgadasy jiberilgen. Brıgada qyzmetkerleriniń aıtýynsha, feldsherler eki kún buryn qolynan jaraqat alǵan naýqasty tekserip, oǵan shuǵyl túrde aýrýhanaǵa jatýdyń qajeti joq ekenin aıtqan. Alaıda bul eskertýge páterde bolǵan ózge tulǵa kónbeı, brıgada qyzmetkerlerin balaǵattap, qol jumsaǵan. Sonymen qatar páterdegi adamdar esikti kilttep, feldsherlerdi úıden shyǵarmady. Oqıǵa ornyna 102 arqyly patrýl shaqyryldy, sodan keıin ǵana medıtsına qyzmetkerleri páterden shyǵa aldy. Qazirgi ýaqytta quqyq qorǵaý organdaryna shaǵym jazyldy, – dep habaraldy Qoǵamdyq densaýlyq saqtaý basqarmasy baspasóz qyzmetinen.
Almaty qalasy polıtsııa departamentiniń baspasóz qyzmeti atalǵan jaǵdaı boıynsha 3 tulǵanyń ústinen qylmystyq is qozǵalǵanyn habarlady.
- Polıtsııa qyzmetkerleri úsh quqyq buzýshyǵa qatysty uryp-soǵý, spırttik ishimdikterdi ishý, tynyshtyqty buzý jáne tirkeýsiz turý faktileri boıynsha is qozǵady. Sot-medıtsınalyq saraptama taǵaıyndaldy. Іs sheshim qabyldaý úshin sotqa jiberiletin bolady, – dep habarlady Polıtsııa deparatamentinen.
