Almatyda jedel járdem qyzmetkerlerine 11 ret shabýyl jasalǵan: endi olar beınejeton taǵady
ASTANA. KAZINFORM — Almatyda jedel járdem jáne mobıldi medıtsınalyq brıgadalarǵa 468 smart-beınejeton berildi. Qurylǵylar shaqyrtý kezindegi jaǵdaıdy jazyp, qaýip tóngende dabyl sıgnalyn jiberýge múmkindik beredi. Qalada jyldyń basynan beri medıtsına qyzmetkerlerine 11 ret shabýyl jasalǵan. Bul týraly DSM málim etti.
Jalpy sany 468 beınejetonnyń 378-i Jedel medıtsınalyq járdem qyzmetiniń kóshpeli brıgadasyna, al qalǵan 90-y medıtsınalyq-sanıtarııalyq alǵashqy kómek uıymdarynyń mobıldi brıgadasyna berildi.
— Bul — medıtsına qyzmetkerleriniń qaýipsizdigin arttyrýǵa jáne olardyń quqyqtaryn qorǵaýǵa baǵyttalǵan mańyzdy joba. Smart-beınejetondar shaqyrtý kezinde oryn alǵan jaǵdaıdy beınetaspaǵa túsirýge, qaýip tóngen jaǵdaıda dabyl sıgnalyn jiberýge jáne beınejazbany saqtaýǵa múmkindik beredi. Bul daýly jaǵdaıdy obektıvti túrde qarastyrýǵa jáne medıtsına qyzmetkerleriniń quqyqtyq qorǵalýyn qamtamasyz etýge kómektesedi. Tek 2026 jyldyń ózinde jedel járdem qyzmetkerlerine 11 ret shabýyl jasalǵany tirkeldi, — dep atap ótti Marat Pashımov.
Smart-beınejetondar medıtsınalyq brıgadalardyń shaqyrtýǵa shyǵýy kezinde beınejazba júrgizýdi jáne qaýip týyndaǵan jaǵdaıda dabyl sıgnalyn jiberýdi qamtamasyz etedi. Beınematerıaldar Jedel medıtsınalyq járdem qyzmetiniń ishki serverinde saqtalady. Jazbalardy saqtaýdyń standartty merzimi keminde 30 kúndi quraıdy. Al tergep-tekserý úshin qajetti materıaldar eki jylǵa deıin saqtalýy múmkin.
Joba Qazaqstan Respýblıkasy Prezıdentiniń Joldaýyn iske asyrý jónindegi tapsyrma aıasynda jergilikti bıýdjet qarajaty esebinen júzege asyryldy.
Vedomstvonyń málimetinshe, «Qazaqtelekom» AQ jobanyń tehnologııalyq seriktesi retinde qyzmet kórsetýdi, ınternet baılanysyn qamtamasyz etýdi jáne tehnıkalyq súıemeldeýdi júzege asyrady.
Almaty qalasynyń jedel medıtsınalyq járdem qyzmeti kún saıyn shamamen 3–3,5 myń shaqyrtýǵa qyzmet kórsetedi. Megapolıs turǵyndary men qonaqtaryna shuǵyl medıtsınalyq kómek kórsetý úshin 196 kóshpeli brıgada jumyldyrylǵan.
Júıe pılottyq synaqtan ótkizilip, qazir shtattyq rejımde jumys istep tur.
Smart-beınejetondardy engizý — medıtsınalyq qyzmetti tsıfrlandyrýmen qatar, kún saıyn adamdarǵa kómek kórsetýge attanatyn medıtsına mamandarynyń qaýipsizdigin arttyrýǵa jáne quqyqtaryn qorǵaýǵa baǵyttalǵan mańyzdy qadam.
Eske sala keteıik, buǵan deıin Almatyda jedel járdem qyzmetkerlerin pyshaqpen qorqytqan eki er adam ustalǵan bolatyn.