Almatyda jedel járdem qyzmetkerlerin pyshaqpen qorqytqan eki er adam ustaldy

Qalalyq polıtsııa departamentiniń málimetinshe, quqyqbuzýshylar aldymen jedel járdem shaqyrǵan. Alaıda medıtsına qyzmetkerleri kelgen soń, olardy pyshaqpen qorqytqan.

Oqıǵa týraly tártip saqshylaryna jedel járdem brıgadasy habarlady. Nátıjesinde Qazybek bı jáne Báribaev kósheleriniń qıylysyna polıtsııa qyzmetkerleri jedel jetip, eki er adamdy ustady.

- Aldyn ala málimet boıynsha olardyń esirtkige masań kúıde bolǵany anyqtaldy. Ekeýi medıtsına qyzmetkerleri kelgenge deıin sıntetıkalyq esirtki qoldanǵandaryn aıtty. Jedel járdem qyzmetkerleriniń eshqaısysy zardap shekken joq. Ustalǵandar polıtsııa bólimshesine jetkizildi, - dep habarlady departamentten.

Qazir oqıǵanyń barlyq mán-jaıy, onyń ishinde pyshaqtyń qaıdan alynǵany, ony saqtaý jáne alyp júrý maqsaty anyqtalyp jatyr. Polıtsııa ár adamnyń áreketine quqyqtyq baǵa beriletinin atap ótti.

Eske salaıyq, buǵan deıin Túrkistan oblysynyń Qazyǵurt aýdanynda jedel járdem qyzmetkerleriniń jol jóndep jatqan sáti túsirilgen vıdeo áleýmettik jelide qyzý talqyǵa tústi.