Almatyda jazǵy lagerge kimder tegin bara alady
ALMATY. KAZINFORM – Almatyda jazǵy demalys maýsymynda balalardy saýyqtyrý lagerlerine joldama berý jumystary júrgizilip jatyr. Balalardyń demalysy maýsym-tamyz aılary aralyǵynda uıymdastyrylady. Al joldamalar bilim berý uıymdary arqyly bólinedi.
Almaty ákimdiginiń málimetinshe, tegin joldama alýǵa kelesi sanattaǵy balalar quqyly:
• az qamtylǵan otbasylardyń balalary;
• jetim balalar jáne ata-anasynyń qamqorlyǵynsyz qalǵan balalar;
• erekshe bilim berý qajettiligi bar balalar.
Jeńildik sanatyndaǵy balalardyń tizimi rastaıtyn qujattar negizinde mektepter men aýdandyq bilim bólimderi arqyly jasaqtalady.
Lagerge jazylý úshin ata-analar áýeli balasy oqıtyn mektepke júginýi qajet. Ótinish synyp jetekshisi nemese mektep ákimshiligi arqyly qabyldanady. Mektep qajetti aqparat berip, tıisti tizimdi túzedi.
Bala mektep usynǵan tizimge engizilmese, ata-analar turǵylyqty jeri boıynsha aýdandyq bilim bólimine júgine alady.
Joldama rásimdeý úshin mynadaı qujattar qajet:
• ata-anasynyń nemese zańdy ókiliniń ótinishi;
• balanyń týý týraly kýáliginiń kóshirmesi;
• jeńildik sanatyn rastaıtyn qujattar (bar bolsa);
• balanyń densaýlyq jaǵdaıy týraly medıtsınalyq anyqtama.
Jazǵy demalysqa arnalǵan tizim aldyn ala, negizinen kóktemde jasalady. Lager jumysy jaz aılarynda uıymdastyralady. Bala tizimge engizilgennen keıin mektep demalys orny men lagerge barý kúni týraly aqparat beredi.
Ákimdik oryn sany shekteýli ekenin, sol sebepti ótinishti aldyn ala berý keregin eskertti. Negizgi tizimde oryn bolmaǵan jaǵdaıda qosymsha joldama boıynsha aqparatty naqtylaýǵa nemese aqyly demalysty qarastyrýǵa bolady.
Eske salaıyq, munyń aldynda almatylyq zeınetkerler shıpajaıǵa joldamany qalaı ala alatynyn jazǵanbyz.
