Almatyda jazdyń alǵashqy aıynda kún raıy qalaı bolady
ALMATY. KAZINFORM – Almatyda jazdyń basy ystyq bolady. Maýsym aıynyń keıbir kúnderi aýa temperatýrasy +36…+41°S-qa deıin kóterilýi múmkin. Sınoptıkter sonymen qatar shilde men tamyz aıyn maýsymnyń eń qurǵaq kezi bolady dep boljap otyr. Ystyqtan ys basyp, órt kóbeıip, osyndaı qaýipti jaıttar eselep ósýi yqtımal.
«Qazgıdromet» RMK meteorologııalyq boljamdar bóliminiń basshysy Dáýlet Kisebaevtyń málimetinshe, jazdyń basyndaǵy temperatýra klımattyq normadan shamamen bir gradýsqa joǵary bolmaq. Mamandar kún raıy osy kezderi kóp qubylatynyn aıtady. Ystyq kúnnen keıin ásirese Almatynyń taý bókterindegi aýdandarda aıaqasty nóser jańbyr jaýyp ketip, naızaǵaı oınap, ekpini kúshti jel soǵyp, artynsha burshaq jaýýy da ábden múmkin.
– Almatyda jazda nóser jańbyr jaýyp, naızaǵaı oınap, burshaq jaýýy ábden múmkin. Jazda mundaı jaǵdaı ásirese keshki ýaqyt pen taý bókterindegi aýdandarda jıileıdi. Sondyqtan turǵyndar aýa raıyna baılanysty eskertý men resmı boljamdardy muqııat baqylap otyrǵany durys, - deıdi Dáýlet Kisebaev.
Ádettegideı, jazdyń ekinshi jartysy – shilde men tamyz eń qurǵaq kezeń bolmaqshy. Joǵary temperatýra men jaýyn-shashynnyń azdyǵy, ásirese taý bókterin men tabıǵı aýmaqtarda órt qaýpiniń artýyna ákeledi.
Sınoptıktiń aıtýynsha, qala klımaty birtindep jylynyp keledi eken. Ystyq kúnder kóbeıip, qys jumsaryp, kúnniń alaı-dúleı bolyp ketýi jıilepti.
– Bul – álemniń kóp elinde bolyp jatqan jahandyq klımattyq ózgeristiń bir bóligi. Almaty turǵyndary onyń saldaryn qazirdiń ózinde sezine bastady. Jaz uzaǵyraq bolyp, qatty ystyq tolqyndary jıilep keledi. Sonymen qatar aýa raıy da qubylmaly bola tústi, - deıdi spıker.
Aptap ystyq aýa sapasyna da áser etýi múmkin. Joǵary temperatýra men álsiz jel kezinde atmosferadaǵy lastaýshy zattar nashar taralady. Almatynyń jer bederin eskersek, bul ys basýǵa alyp kelýi yqtımal.
Sınoptıkter aptap ystyq kezinde kúnniń astynda uzaq turmaı, sýdy jıi iship, aýyr jumystan aýlaq bolyp, balalar men qart adamdarǵa erekshe kóńil bólý kerek ekenin aıtyp otyr. Sonymen qatar mamandar aýa raıy boljamyn únemi nazarda ustaý kerektigin eskertti.
Eske salaıyq, buǵan deıin Qazaqstanda 21-22 mamyrda kún raıy kúrt qubylyp, úsik júrip, jaýyn-shashyn túsetinin habarlaǵanbyz.
