Almatyda jaıaý júrginshilerge arnalǵan «qaýipsizdik araldary» salyndy
Almatyda bıyl joldardy ortasha jóndeý aıasynda jaıaý júrginshilerge arnalǵan jeti «qaýipsizdik araldary» salyndy, dep habarlaıdy QazAqparat tilshisi.
Almaty ákimdigi habarlaǵandaı, «qaýipsizdik araldary» Seıfýllın dańǵylynda, Jumabaev kóshesinen tómen, Abaı dańǵyly men Abylaı han dańǵylynyń qıylysynda, sonymen qatar, Jeltoqsan, Qonaev, Naýryzbaı batyr jáne Masanshy kóshelerinde paıda boldy. Araldar Almaty ákimdiginiń jobalyq keńsesiniń qoldaýymen «Vision Zero Almaty» is-sharasy boıynsha mektepter, balalar jáne mektepke deıingi mekemeler mańynda jabdyqtalady.
«Qaýipsizdik araldary» - bul jaıaý júrginshiler kólik legin kútetin jáne kólik ıeleri jyldamdyqty tómendetýi tıis arnaıy tańbalanǵan joldaǵy shaǵyn aımaqtar. Bul álemniń kóptegen elinde jol qozǵalysy qatysýshylarynyń qaýipsizdigin arttyrý jáne jol apattary sanyn azaıtý úshin ornatylady.
Sonymen birge, jolaýshylardyń qaýipsizdigi men qoǵamdyq kóliktiń yńǵaıly toqtaýyna, aıaldamada múmkindigi shekteýli adamdarǵa arnalǵan 4 jáne odan da kóp jolaqty joldarda avtobýs pandýstaryn ornatý úshin avtobýs qaltalary joıylady. Bul jumystar Seıfýllın dańǵylynda, Abaı dańǵylynda, Saıyn dańǵylynda júrgizildi. Sondaı-aq megapolıste jolaýshylardyń avtobýstardy jaıly kútýi úshin aıaldamalar tıisti jaǵdaıǵa keltiriledi», - delinedi ákimdiktiń habarlamasynda.
Almaty qalasynyń mobıldilik basqarmasy bıyl uzyndyǵy 200 shaqyrym bolatyn 230 kósheni ortasha jóndeýden ótkizdi. Bul rette Almaty ákimi Erbolat Dosaevtyń tapsyrmasymen qalaǵa keıinnen qosylǵan aýdandardaǵy jańa joldardyń qurylysyna erekshe nazar aýdaryldy.
«Birinshi kezekte osy aýdandarda ınjenerlik jelilerdiń qurylysy júrgizildi, keıin asfalt tóseldi. Ál-Farabı, Abaı dańǵyly jáne t.b. negizgi magıstraldyq kóshelerde alǵash ret biregeı jabyn – polımerli asfalt qoldanyldy, ol tózimdi, joldy paıdalaný merzimin birneshe ese arttyrady», - dep habarlady Almaty ákimdigi.
Aıta keteıik, Almatyda uzyndyǵy 3 097 shaqyrym bolatyn 2746 kóshe bar. Ákimdiktegiler bıyl jaqsy jáne qanaǵattanarlyq jaǵdaıdaǵy avtojoldardyń úlesin ótken jylǵy 86%-dan 89%-ǵa, al 2025 jyly 95%-ǵa deıin kóterýdi josparlap otyrǵanyn habarlady. Ol úshin jyl saıyn uzyndyǵy keminde 200 shaqyrym bolatyn joldarǵa ortasha jóndeý jumystaryn júrgizý kózdelgen.