Almatyda jaıaý júrginshi eki avtobýstyń ortasynda qysylyp qala jazdady
ALMATY. KAZINFORM – Almatyda joldyń boıynda avtobýs júrgizýshisi men jaıaý júrginshi arasynda sózge kelip qaldy.
Áleýmettik jelige shyqqan vıdeodan Abaı dańǵyly men Saıyn kóshesiniń qıylysynda er adam júrip bara jatqan avtobýstyń aldyna shyǵyp, turyp alǵanyn kórýge bolady. Sebebi ol basqa kólikti avtobýstyń aldynan ótkizgisi kelgen. Biraq avtobýs júrgizýshisi kólikti toqtatpaı, alǵa qaraı júre berdi. Saldarynan jaıaý júrginshini aldyndaǵy avtobýsqa qysa jazdady. Keıin ekeýiniń arasynda janjal shyqty.
Almaty qalalyq polıtsııa departamenti kólikke jol berý jáne qaýipsizdik belbeýin paıdalaný erejelerin saqtamaý týraly jol erejesi talaptaryn oryndamaǵany úshin avtobýs júrgizýshisi jaýapqa tartylǵanyn, al jaıaý júrginshiniń jeke basy anyqtalyp jatqanyn habarlady.