Almatyda jaýyn-shashynǵa baılanysty kommýnaldyq qyzmet daıyndyǵy kúsheıtildi
ALMATY. KAZINFORM – Almatyda jaýyn-shashyn men naızaǵaıǵa baılanysty kommýnaldyq qyzmet joǵary daıyndyq rejımine kóshirildi. Bul jóninde qalalyq kommýnaldyq ınfraqurylym jáne turǵyn úı ınspektsııasy basqarmasynyń ókilderi habarlady.
«Qazgıdromet» derekterine sáıkes, 23 sáýir kúni saǵat 15:00-den bastap jaýyn-shashyn túsedi, al 17:00-den keıin keı tustarda nóser jańbyr jaýyp, jeldiń ekpini sekýndyna 15-18 metrge deıin jetedi. 24 sáýirde de jańbyr, keı jerde nóser jaýyn jaýyp, naızaǵaı oınaıdy. Al 25 sáýirde kún qubylmaly, ótkinshi jańbyr jaýýy múmkin.
– Sý basý qaýpiniń aldyn alý jáne olardy jedel joıý maqsatynda qalalyq qyzmet táýlik boıy kezekshilik uıymdastyrdy. Atap aıtqanda: 104 birlik arnaıy tehnıka, 74 motopompa, 12 assenızatorlyq kólik, 425 jol qyzmetkerinen quralǵan 75 jedel brıgada jáne 2300 dana qum toltyrylǵan qap daıyndaldy, - dep habarlady vedomstvo.
Sonymen qatar Almaty qalasynyń qutqarý qyzmeti men tótenshe jaǵdaılar departamenti bólimsheleri de kúsheıtilgen kezekshilik atqarady. Jalpy qala boıynsha táýligine 2,7 myńnan astam jol qyzmetkeri men 1,2 myńnan astam tehnıka jumyldyrylǵan.
Eske salaıyq, buǵan deıin Almatyda jaýyn-shashyn kezinde aryqqa qulaǵan er adam mert boldy.
