Almatyda jaýyn-shashynǵa baılanysty keptelis kúsheıdi
ALMATY. KAZINFORM – Almatyda kún sýytyp, jańbyr jaýyp jatyr.
Kólik júrgizýshileri úshin qolaısyz aýa raıyna baılanysty qala kóshelerindegi keptelis kúsheıdi. Megapolıste kúndelikti keshki ýaqyttaǵy keptelis 7-9 ball aralyǵynda bolsa, dál qazir 10 balǵa jetken. 2GiS málimetine sáıkes, qalanyń barlyq negizgi kósheleri «qyzyl» jáne tipti «qoıý qyzyl» túspen boıalǵan.
Eske salaıyq, Almatyda aýa raıynyń qolaısyzdyǵyna baılanysty kommýnaldyq qyzmet kúsheıtilgen daıyndyq rejımine aýystyryldy.
«Almaty Tazalyq» mekemesi jáne merdiger uıymdar táýlik boıy kezekshilik uıymdastyrdy. Jumystarǵa 104 arnaıy tehnıka, 74 motopompa jáne 12 assenızatorlyq kólik tartylyp, onyń 9-y sý basý qaýpi joǵary aýmaqtarǵa ornalastyryldy. 75 jedel brıgada jasaqtalyp, 2 300 qum toltyrylǵan qap ázirlendi. Jalpy táýliktik kezekshilikke 2 710 jol salasy qyzmetkeri jumyldyryldy.
Sondaı-aq aýa raıynyń kúrt buzylýyna baılanysty Tótenshe jaǵdaılar departamenti eskertý jasady.