Almatyda jaýyn-shashyn men sý deńgeıi kóterilýiniń saldary qandaı
ALMATY. KAZINFORM — Almatyda keıingi kúnderi nóserli jaýyn saldarynan ózenderde sý deńgeıi kóterilip, sel qaýpi kúsheıdi.
Ásirese, 1 shilde kúni Úlken Almaty ózeninde sý deńgeıi kóterildi. Sondaı-aq Aqsaı ózeni arnasynan shyqty. Qala turǵyndary tabıǵı qubylystyń saldarymen áleýmettik jelide bólisip jatyr. Máselen, almatylyqtardyń biri túsirgen beınejazbadan rekonstrýktsııadan ótip jatqan Úlken Almaty ózeni arnasynda granıt tastarǵa zaqym kelgenin kórýge bolady. Oǵan pikir jazǵan turǵyndar jyldary boıy myzǵymas kúıde bolǵan ózen arnasynyń jańǵyrtý jumystarynan keıin jyldam buzylyp jatqanyna narazylyq bildirdi.
Atalǵan jaǵdaıǵa baılanysty Almaty ákimdigi túsinikteme berdi. Resmı jaýapqa sáıkes, 1 shildede jaýyn-shashynnyń túsýine baılanysty Úlken Almaty ózeninde sý aǵysy 8 m³/s-qa deıin kúsheıgen. Ózendegi sý deńgeıiniń kóterilýinen Toraıǵyrov kóshesinen tómen ornalasqan ýchaskede qoldanystaǵy granıt qaptamasynyń jekelegen elementteriniń buzylýy baıqalǵan.
— Merdiger uıym jedel tártipte granıt qaptamasyn bekitý jumystaryn júrgizip jatyr. Atalǵan granıt plıtalar burynnan bar konstrýktsııalar jáne joba aıasynda olardy ornatý jumystary júrgizilgen joq, — dep túsindirdi ákimdikten.
Sondaı-aq «№ 1 tundyrǵyshtan Abaı dańǵylyna deıingi Úlken Almaty ózeniniń arnasyn jańǵyrtý» jobasy boıynsha qurylys-montajdaý jumystary jalǵasyp jatqany, nysan paıdalanýǵa berilmegeni jáne tapsyrys berýshi tarapynan áli qabyldanbaǵany habarlandy.
— Osyǵan baılanysty oryndalatyn qurylys-montajdaý jumystarynyń sapasyna, nysannyń saqtalýyn qamtamasyz etýge jáne anyqtalǵan kemshilikterdi joıýǵa merdiger uıym jaýapty bolady. Qurylys-montajdaý jumystary aıaqtalyp, nysan paıdalanýǵa berilgennen jáne qabyldaý aktisine qol qoıylǵannan keıin 3 jyl merzimge kepildik merzimi belgilenedi. Osy ýaqyt ishinde merdiger uıym týyndaǵan aqaýlar men kemshilikterdi óz qarajaty esebinen joıýǵa mindetti, — dep naqtylady qala ákimdiginen.
Odan bólek áleýmettik jelilerde Saıran kólindegi jaǵdaı da jarııalandy. Beınerolıkterden ózen aǵysymen batpaq, laı jáne qoqystyń kólge kelgenin kórýge bolady. Sonymen qatar jaǵalaýda tas pen qoqys jınalyp qalǵan.
Eske salaıyq, Almaty oblysynda Aqsaı ózeni tasýynan sý jelisi zaqymdandy.
