Almatyda jaýyn-shashyn men kóktaıǵaqqa baılanysty qaýipsizdik sharalary kúsheıtildi
ALMATY. KAZINFORM — Almatyda aldaǵy kúnderi jaýyn-shashyn túsip, kóktaıǵaq bolady. Osyǵan baılanysty kommýnaldyq qyzmetter táýlik boıy jumys isteý rejımine aýysty.
«Qazgıdromet» RMK dereginshe, 4 qarasha kúni saǵat 3:00–ten 20:00–ge deıin jalpy 5-6 mm kóleminde jańbyr jaýady. Aýa temperatýrasy túnde jáne kúndiz +5…+7 gradýsqa deıin tómendeıdi. 5 qarashada aýyspaly bultty, keı jerlerde jańbyr men qar túrindegi jaýyn-shashyn (qalyńdyǵy 10 mm-ge deıin), kóktaıǵaq bolady. Aýa temperatýrasy túnde -3…-5 °S, kúndiz +1…+3 °S shamasynda.
«Almaty Tazalyq» kásiporyndarynyń bazalarynda júrgizýshiler, mehanızatorlar men jumysshylar táýlik boıy kezekshilik atqarady. Qar túspeı turyp, magıstraldyq kóshelerge aldyn ala suıyq reagentter sebiledi. Ákimdiktiń málimetinshe, qazirgi tańda qala aýmaǵynda 204 qum shashqysh tehnıka daıyn tur.
— Jalpy táýlik boıǵy jumysqa 580 arnaıy tehnıka men 2500-den astam jumysshy jumyldyrylǵan. Aýla ishindegi aýmaqtardy tazalaýǵa 307 tehnıka jáne 1500 jumysshy, al saıabaqtar men skverlerdi kútip ustaýǵa 550 tehnıka men 1900 qyzmetker qatysady. Qalanyń kóshe-jol jelisin baqylaý jáne kóktaıǵaqty der kezinde joıý úshin 75 patrýldik brıgada kezekshilik etedi, — delingen Almaty ákimdigi taratqan habarlamada.
Sonymen qatar Almatynyń Qutqarý qyzmeti de kúsheıtilgen rejımde jumys istep tur. Qyzmet quramynda 1 assenızator kóligi, 15 motopompa jáne 50 qutqarýshy bar.
Aýdan ákimdikterinde kommýnaldyq jumystardyń barysyn baqylaý jáne qyzmetterdiń ózara is-qımylyn úılestirý maqsatynda táýlik boıǵy kezekshilik uıymdastyrylǵan.
Qar tazalaý kezeńinde jol boıyna nemese jıegine qoıylǵan kólikterdi ýaqytsha kóshirý úshin 63 evakýator men manıpýlıator (Polıtsııa departamentinen — 13, Qutqarý qyzmetinen — 20, «Almaty parkıngten» — 30) jumyldyrylady.
Almaty ákimdigi jol men trotýardaǵy kóktaıǵaqqa baılanysty qala turǵyndaryna barynsha saqtyq sharalaryn saqtaýdy eskertti.
Kólik júrgizýshileri qozǵalys jyldamdyǵyn tómendetip, qaýipsiz araqashyqtyqty saqtaýy, kúrt burylys pen tejeýden aýlaq bolýy, tejeý jolynyń uzaratynyn eskerýi, qysqy dóńgelekterdi der kezinde aýystyrýy qajet.
— Júrgizýshilik tájirıbesi az azamattarǵa jeke kólikti ýaqytsha paıdalanbaýǵa jáne qoǵamdyq kólikke basymdyq berýge keńes beremiz. Sonymen birge kólikti qysqy dóńgelekke ýaqytyly aýystyrmaǵan jaǵdaıda ákimshilik jaýapkershilik qarastyrylatynyn eske salamyz.
Júrginshilerge trotýarlar men júrginshiler ótkelderinde abaı bolý, tabany taımaıtyn aıaq kıim kııý, eńis, ór jáne baspaldaqta saqtyq tanytý qajet. Qaýipsizdik saqtańyz, — delingen habarlamada.
Eske salaıyq, Almatyda aýa temperatýrasynyń kúrt tómendeýine jylytý maýsymyn ádettegiden erterek bastaý týraly sheshim qabyldanǵan edi.
Turǵyn úılerdi ortalyq jylý júıesine qosý 10 qazannan bastaldy.