Almatyda jaýdyń júzdegen mınasyn joıǵan 102 jastaǵy soǵys ardageri turady
ALMATY. KAZINFORM — Ekinshi dúnıejúzilik soǵysta bir ózi jaýdyń 600 mınasyn joıǵan Zulqarnaı Seıitov qazir 102 jasta. Lenıngrad, Stalıngrad qalalaryn azat etýge qatysyp, Berlınge deıin jetken qart ardagermen Kazinform tilshisi áńgimelesip qaıtty.
Ǵasyrdy eńsergen soǵys ardageri bıyl — 102 jasta. Densaýlyǵy syr berip, aıaǵy aýyryp, júrýi qıyndasa da, ózin izdep kelgen kisiniń sharýasyn tyńdap, buıymtaıyn suramaı, jibermeıdi.
Kazinform agenttiginiń tilshisi ekenimizdi aıtyp, ózimizdi tanystyrǵanymyz sol edi, qart maıdanger áńgimesin birden Jeńis kúnin Berlınde qarsy alǵanyn bastap ketti.
Aıtýynsha, sol kezdiń árbir sáti álige deıin kóz aldynda.
— Ol umytylatyn, jadymyzdan óshetin nárse emes. «Soǵys bitti» degen jalǵyz aýyz sózdi estigendegi qýanyshty aıtyp jetkizý múmkin emes. Bárimiz biri-birimizdi qushaqtap, jyladyq. Árıne, ol qýanyshtyń kóz jasy. 1945 jyly 30 sáýir kúni biz Berlınde boldyq. Germanııa «kapıtýlırovat» etti, soǵys bitti dep jarııalady, — deıdi qarııa.
Zulharnaı Seıitov 1922 jyldyń 27 jeltoqsanynda Omby oblysynyń Jańa Kıpchak aýylynda dúnıege keldi. 1941 jylydyń qarashasynda mektepti aıaqtamaı jatyp maıdanǵa ózi suranyp attanady.
Aldymen jas jaýynger tank joıýdyń ádisin oqyp, kýrstan ótedi. Qarý ustap, ıisshil ıttermen jumys isteýdi úırenedi.
— Keńes Odaǵynda «Qyzyl juldyz» áskerı ıt ósirý mektebi quryldy.1942 jyly bir aı boıy biz jattyǵýdyń negizderin zerttedik, sodan keıin ıtterdi daıyndadyq. Úıretilgen ıtterdiń árqaısysynyń jaǵynda medıtsınalyq sómke baılanǵan. Ol jaralyǵa qaraı jorǵalap baryp sómkesinen bınt alyp shyǵyp, jaýyngerdiń jarany tańýyn kútetin. Osylaısha olar soǵysta dárigerlerdi almastyrdy, — dedi soǵys ardageri.
Aıtýynsha, ıtter maıdan dalasynda tiri adamdy marqumnan ajyrata aldy, kóptegen jaraly es-tússiz kúıde bolǵanda ıtter jaýyngerlerdiń betin jalap, esin jınaýǵa kómektesken.
Lenıngrad, Stalıngrad qalalaryn azat etýge qatysqan ol áskerdiń jolyn jarylǵysh zattan tazalap, Berlınge deıin barǵan.
Qart maıdangerdiń sózinshe, soǵysta bir ózi jaýdyń 600 mınasyn joıǵan.
Soǵys aıaqtalǵan soń Zulqarnaı Seıitov mektep partasyna qaıta otyryp, oqýyn támamdaıdy. Ombydaǵy aýyl sharýashylyǵy ınstıtýtyna túsedi. Ony bitirgen soń ǵylymmen aınalysady.
Qazaqstan-Reseı medıtsınalyq ýnıversıtetiniń Molekýlıarlyq bıologııa kafedrasynyń professory Zulqarnaı Seıitov 150-den astam ǵylymı jumys pen monografııanyń, 10 oqý quralynyń, onyń ishinde «Bıohımııa» boıynsha 14 patenttiń jáne 8 avtorlyq kýáliktiń avtory.
Onyń kóptegen ázirlemesi men jańalyqtary búginde medıtsınada da, tamaq ónerkásibinde de keńinen qoldanylyp keledi.
Ardager «Qyzyl Juldyz», II dárejeli «Otan soǵysy» ordenderimen, «Stalıngradty qorǵaǵany úshin», «Erligi úshin», «Eren eńbegi úshin» jáne taǵy basqa medaldarmen marapattalǵan.
103 jasqa aıaq basqan soǵys ardageri Zulqarnaı Seıitov barshaǵa batasyn berip beıbit te, berekeli ómir tiledi.
— Qazaq jastary óse bersin. Elimizdiń maqtanyshyna aınalsyn. Soǵys bolmasyn. Beıbit zaman bolsyn. Qazir 100 jastan astym. Bári syılaıdy. Óte rızamyn, — dedi qart maıdanger.
Resmı derekke súıener bolsaq, soǵys jyldary maıdanǵa 1,3 mln qazaqstandyq shaqyryldy. Qazaqstannyń 100 myńnan astam sarbazy jaýyngerlik ordendermen jáne medaldarmen marapattaldy, 500-den astam adam Keńes Odaǵynyń Batyry atandy.
Buǵan deıin Prezıdent Teleradıokesheni soǵys ardageri Jaqan Seısebaevty ǵasyr jasymen quttyqtaǵan bolatyn.
Almaty ákimdiginiń málimetinshe, Jeńistiń 80 jyldyǵyna oraı árbir soǵys ardagerine memleket tarapynan 5 mln teńgeden syıaqy beriledi.
Qazir megapolıste 21 ardager turady.