Almatyda jataqhanadan oryn tappaǵan stýdentterge kómektesetin ortalyq ashyldy
ASTANA. KAZINFORM – Almatyda jańa oqý jyly qarsańynda stýdentterdi jataqhanamen qamtamasyz etý jónindegi Ahýaldyq ortalyq jumysyn bastady, dep habarlaıdy Ǵylym jáne joǵary bilim mınıstrligi.
Ortalyq Ǵylym jáne joǵary bilim mınıstrligi men Almaty qalasy ákimdiginiń bastamasymen Qazaq ulttyq qyzdar pedagogıkalyq ýnıversıtetiniń (QyzPU) bazasynda ashyldy.
Onyń negizgi maqsaty – jataqhanadan oryn taba almaı qalǵan nemese ornalasý kezinde qıyndyqqa tap bolǵan stýdentterge jedel kómek kórsetý.
– Joǵary oqý oryndarynyń tsıfrlyq platformalary arqyly jataqhanaǵa oryn brondap úlgermegen nemese ornalasý barysynda qıyndyqtarǵa tap bolǵan bilim alýshylar Ahýaldyq ortalyqqa tikeleı júgine alady. Ortalyq mamandary árbir ótinishti jedel qarap, bos oryndar bazasy arqyly tıisti jataqhanalardan nemese seriktes uıymdardan ýaqytsha turý ornyn usynýǵa múmkindik jasaıdy, – delingen habarlamada.
Ortalyqta 8 jumys orny uıymdastyrylǵan. Olardyń árqaısysy kompıýterlik tehnıkamen, tsıfrlyq derekqorlarǵa qoljetimdilikpen jáne bir mezgilde 10 qońyraýdy qabyldaıtyn kóparnaly baılanys júıesimen jabdyqtalǵan.
Bul mamandarǵa Almatydaǵy joǵary oqý oryndarymen jáne jataqhana ákimshilikterimen turaqty baılanysta bolyp, stýdentterdiń máselelerin jedel sheshýge múmkindik beredi.
Ortalyqta stýdentter men kelýshiler úshin kútý jáne demalys aımaǵy, oqý buryshy, kofe-breık aımaǵy, sondaı-aq jınalystar men jedel brıfıngter ótkizýge arnalǵan konferents-zal qarastyrylǵan.
Ahýaldyq ortalyq Almaty qalasy, Bógenbaı batyr kóshesi, 142 mekenjaıynda ornalasqan.
– Stýdentter ortalyqqa +7 700 255 14 43, +7 700 950 95 28 jáne +7 727 237 01 70 telefon nómirleri arqyly habarlasa alady, – dep habarlady mınıstrlik.
Aıta keteıik, depýtat jataqhana oryndaryn bóletin ulttyq tsıfrlyq platformany qurýdy usyndy.
