Almatyda jastarǵa arnalǵan jasandy ıntellekt mektebi ashyldy

ALMATY. KAZINFORM — Almaly aýdanyndaǵy komıýnıtı ortalyqta jastarǵa arnalǵan jasandy ıntellekt mektebi jumysyn bastady. 

Almaty qalasy Jastar saıasaty basqarmasynyń qoldaýymen IT Qazaq Community seriktestigi júzege asyrǵan joba jastardyń tsıfrlyq daǵdylaryn damytýǵa baǵyttalǵan. 

Jastar saıasaty basqarma basshysy Azız Qajdanbektiń aıtýynsha, bir ortalyqta bastalǵan joba sátti bolsa, mundaı kýrstar barlyq komıýnıtı ortalyqta iske qosylady. 

— Jasandy ıntellekt — bolashaqtyń tehnologııasy. Ony joqqa shyǵarýǵa bolmaıdy. Óıtkeni JI kásipte de, IT salasynda da, oqý-bilim protsessinde de qoldanysqa endi. 2025 jyldyń basynda ózimizge jastardy osy baǵytta oqytsaq degen maqsat qoıyp, búgin ony oryndaý úshin Qazaq Community qaýymdastyǵymen memorandýmǵa qol qoıdyq, - dedi ol. 

Joba aıasynda Almaty jastary jasandy ıntellekt tehnologııalaryn tegin úırenip, zamanaýı AI-quraldaryn meńgerip, olardy oqý, zertteý jáne bolashaq kásibı qyzmetinde qoldana alady. Baǵdarlama boıynsha jasandy ıntellekt quraldary tájirıbe júzindi oqytylyp, olardy naqty qoldaný tásilderin úıretiledi.

Jasandy ıntellekt kýrstaryna nıet bildirgen jastar Almaly aýdanyndaǵy komıýnıtı ortalyqqa baryp qatysa alady.

Eske salaıyq, buǵan deıin Parlament Májilisinde «Jasandy ıntellekt týraly» zań jobasy men ilespe qujat tanystyrylǵanyn jazǵanbyz. Ol boıynsha adam minez-qulqyn manıpýlıatsııalaı alatyn JI qurýǵa tyıym salynbaq.