Almatyda jastarǵa arnalǵan komıýnıtı ortalyqtary ashyldy — fotoreportaj
Megapolıstiń ár aýdanynda jastarǵa arnalǵan komıýnıtı ortalyqtar ashyldy, onda olar túrli kýrsqa tegin qatysyp, shyǵarmashylyq ıdeıalarmen almasady, bilim alyp, jumys ta taba alady, dep habarlaıdy Kazinform.
Almaty ákimdigi taratqan málimetke sáıkes, komıýnıtı ortalyqty damytý jónindegi joba — Qazaqstandaǵy alǵashqy ári ázirge jalǵyz. Ol úshin ákimdik 2023 jyly ǵımarattar satyp alyp, jóndedi.
Osylaısha qalada NEET delinetin jastardyń paıyzyn qysqartý jáne jas talanttardyń damýyna jaǵdaı jasaý josparlanǵan.
300 sharshy metrden bastalatyn qoǵamdyq keńistikti 8 komıýnıtı ortalyq kóp aýdıtorııadan turady, yńǵaıly kovorkıng aımaqtarymen jáne yńǵaıly ári ýaqytty tıimdi ótkizý úshin qajetti jabdyqtarmen jabdyqtalǵan. Komıýnıtı ortalyqtar jylyna 800 myńnan astam jasqa qyzmet kórsetedi.
Ár ortalyqta rezıdentterge kýrs tańdaýǵa nemese mamandyq týraly sheshim qabyldaýǵa kómektesetin steıkholder bar. Mysaly, mobılografııa, targetıng nemese SMM kýrstaryn oqý, sonymen qatar, kásip ashqysy keletinder zańgermen kásipkerlerden keńes ala alady.
Jastardy kóptep tartý úshin túrli tásil — aqparattyq kitapshalar taratýǵa deıin qoldanylady. Negizi áleýmettik jelilerge basymdyq beriledi.
Medeý aýdanyndaǵy komıýnıtı ortalyqtyń steıholderi Rýstam Qaıryevtyń aıtýynsha, ortalyqtarda jumyssyz jastar belgili bir jetistikke jetken. Zamandastarymen tyǵyz aralasyp, qaı baǵytta qımyldaý kerektigi jaıly jańa baǵdar ala alady.
«Medıasaýattylyq kýrsyn ótkizemiz, qazaq tilin damytamyz. Bizde úıden shyqpaı-aq qazaq tilin tegin úırenýge múmkindik beretin qyzyqty „Úıde sóıle“ jobasy bar: buǵan qazaq tilin biletin kórshiler kómektesedi, al komıýnıtı ortalyqta aıyna bir ret qazaq tilin zamanaýı ádistermen oqytatyn ambassadorlarmen kezdesýler ótkiziledi», — deıdi Rýstam Qaıryev.
Komıýnıtı ortalyqtardyń zamanaýı stılde jasalǵanyn, al dızaında etnıkalyq element bar ekenin atap ótken jón.
Jetisý aýdanynyń ákimi Gúlnár Kókebaevanyń pikirinshe, komıýnıtı ortalyqtar jastar bas qosatyn oryn ǵana emes, bul Memleket basshysy aıtqandaı olardyń jan-jaqty damýy úshin arnaıy keńistik bolady.
«Qalada 14 jastan 35 jasqa deıingi 689 myńǵa jýyq jas bar. Onyń 58 myńy Jetisý aýdanynda. 14 jastan bastap kóptegen oqýshy bolashaqta qaıda oqý kerektigin, qaı baǵytqa basymdyq berý kerektigin suraıdy. Sondyqtan Almatyda ashylyp jatqan jastarǵa arnalǵan ortalyqtar jastarǵa shynymen kómektesetinine senimdimin», — deıdi Gúlnár Kókebaeva.
Komıýnıtı ortalyqtarynda mýzykant muǵalimder dombyra úırený sabaǵyn ótkizedi. Jastarǵa dybys jazý stýdııasy, psıhologtyń keńesi, ózin-ózi damytý boıynsha sheberlik dáristeri jáne taǵy basqalary qoljetimdi. Buǵan qosa, komıýnıtı ortalyqtarda jastardyń ártúrli bilim berý baǵdarlamalaryn, oqý oryndaryndaǵy granttar, sonyń ishinde ákimniń granty týraly bilýge múmkindigi bar.
«Qalada jastardyń bas qosyp, jan-jaqty damyp, bilim alýyna arnalǵan oryndar jetispeıtin edi. Bul jastardyń ári-beri sabylyp júrmeýine yqpal etip, ár aýdan jastary úshin erekshe mańyzdy oryn bolady», — dedi jastardy, mádenıet pen sportty damytý jónindegi jobalyq keńseniń basshysy Krıstına Bekmýrzaeva.
Barlyq ortalyqta kólikke, qoǵamdyq tamaqtanýǵa, sport jáne mádenı ınfraqurylymdy paıdalanýǵa, oqytý men sheberlik dáristerine jeńildikter beretin keshendi dıskonttyq kartalar jumys isteıdi.
Ortalyqtyń árbir rezıdenti osy artyqshylyqtardy paıdalana alady. Osylaısha, megapolıste tıimdi jastar saıasaty úshin keshendi ınfraqurylym qurý máselesi sheshilip keledi.
