Almatyda jastar jobalaryna 5 mln teńgege deıin qoldaý kórsetiledi
ASTANA. KAZINFORM – Almatyda jastardyń ıdeıalaryn júzege asyrýǵa múmkindik beretin «Jastar qatysatyn bıýdjet» jobasy iske qosylady, dep habarlaıdy qala ákimdigi.
Joba Qazaqstanda alǵash ret júzege asyrylyp otyr. Onyń maqsaty – jastardyń bastamalaryn memlekettik qoldaý arqyly damytý jáne áleýmettik mańyzy bar ıdeıalardy iske asyrýǵa múmkindik berý.
Baǵdarlamaǵa 18 ben 35 jas aralyǵyndaǵy Almaty turǵyndary qatysa alady. Ótinimdi jeke azamattar, bastamashyl toptar nemese jastar uıymdary usyna alady.
– Jobany júzege asyrý úshin 500 myńnan 5 mıllıon teńgege deıin qarjylaı qoldaý kórsetiledi. Baǵdarlamanyń jalpy bıýdjeti 90 mıllıon teńgeni quraıdy, – delingen habarlamada.
Baıqaýǵa ekologııa, kóriktendirý, bilim berý, mádenıet, sport, tsıfrlyq tehnologııa, kásipkerlik, týrızm jáne basqa da áleýmettik mańyzy bar baǵyttar boıynsha jobalar qabyldanady.
– «Jastar qatysatyn bıýdjet» jastardyń qalany damytýǵa tikeleı atsalysýyna, óz ıdeıalaryn usynyp, naqty jobalar arqyly júzege asyrýyna múmkindik beredi, – dep atap ótti ákimdikten.
Ótinimder jasalmaty.kz portaly arqyly onlaın qabyldanady.
Aıta keteıik, Astana kolledjderine qujat qabyldaý bastaldy, bıyl 10 myńnan asa grant bólindi.
