Almatyda jastar uıymdary úshin akademııa qurylady
ALMATY. KAZINFORM – Megapolıste Jastar saıasaty basqarmasynyń qoldaýymen «Almaty qalasynyń jastar uıymdarynyń akseleratory» jobasy iske qosylady. Bul týraly Almatynyń óńirlik kommýnıkatsııalar qyzmetiniń alańynda Almaty qalasy Jastar saıasaty basqarmasynyń Jastardy áleýmettendirý jáne jastar bastamalaryn qoldaý bóliminiń basshysy Nursultan Bekqaıyrov aıtty.
«Jobanyń maqsaty – Almaty qalasynyń jastar saıasaty salasyn damytýdyń strategııalyq qadamdaryn ázirleý maqsatynda tıimdi, sapaly jáne nátıjeli toptyq talqylaýlardy uıymdastyrý», - dedi ol.
Joba aıasynda Almaty qalasynyń jastar uıymdaryn oqytý boıynsha arnaıy akademııa qurylmaq. Akademııa jastar men jastar uıymdarynyń múshelerin modýldik baǵyttar, túrli taqyryptar boıynsha oqytady. Akademııa jobalardy basqarý, granttarǵa ótinimderdi toltyrý, qarjylyq jáne shyǵarmashylyq menedjment salalaryn qamtıdy.
«Bul kýrs óz qyzmetin jańadan bastaǵan úkimettik emes uıymdardyń barlyq ókili úshin, sondaı-aq áleýmettik problemalardy sheshý joldaryn sapaly jáne tıimdi tańdaýdy jáne olardy iske asyrýdy bilmeıtin jastar úshin óte paıdaly jáne mańyzdy bolady», - deıdi Nursultan Bekqaıyrov.
Al, brıfıngige qatysqan «Almaty Stýdentter Alıansy» korporatıvtik qorynyń joba úılestirýshisi Juldyz Jaqsybaı bul joba Almaty qalasynyń 8 aýdanynda júrgiziletinin atap ótti. Joba aıasynda 400-den astam jas qyz-jigit oqytylmaq. Kýrs jastar úshin tegin.
Almaty qalasynyń jastar uıymdarynyń akademııasy týraly tolyq aqparatty ulesqos.kz saıtynan kórýge bolady.
