Almatyda jastar arasyndaǵy jumyssyzdyq deńgeıi tómendedi
ALMATY. KAZINFORM – Almaty qalasy Jastar saıasaty basqarmasynyń málimetine sáıkes, qalada jastar jumyssyzdyǵynyń deńgeıi 2024 jyldyń I toqsanynda 5,2%-dan 4,6%-ǵa deıin tómendegen.
Búgingi kúni Almatyda 14 pen 35 jas aralyǵyndaǵy 682 myńnan astam jas turady, bul turǵyndardyń jalpy sanynyń 32%-y. Almaty qalasyn damytýdyń 2025 jylǵa deıingi jáne 2030 jylǵa deıingi orta merzimdi perspektıvalar baǵdarlamasy aıasynda Jol kartasy bekitilip, onda jastardy áleýmettendirý úshin jańa keshendi tásilder qarastyrylǵan.
Osy joba aıasynda 2023 jyldyń aqpanynda jumys berýshiler men jumyspen qamtý ortalyqtarynyń jumysyn úılestirýge múmkindik beretin Qalalyq mansap ortalyǵy ashyldy. Munda mobılograf, SMM menedjeri, grafıkalyq dızaıner, marketolog syndy mamandyqtar boıynsha 30 qysqa merzimdi kýrstar oqytylady. 2023 jyly 10,8 myń jas oqytylyp, jumysqa ornalasqan. 2024 jyldyń basynan beri ortalyqtarda 3,1 myń jas oqytyldy.
- Men Qyzylorda qalasynyń týmasymyn, jasym 28-de. Ózim temir jol salasynda qatysty mamandyqty oqyǵanmyn. Biraq oqý bitirgen soń mamandyq boıynsha jumysqa ornalasa almadym. Sondyqtan Almaty qalasyna arman qýyp keldim. Munda kólik jýý oryndarynda, taksı retinde jumys istedim. Sóıtip bir kúni Qalalyq mansap ortalyǵyna kelip, ózime qajetti aqparatty aldym. 1 aıǵa jýyq marketolog mamandyǵy boıynsha shaǵyn oqytý kezeńinen óttim. Qazir Túrksib aýdanynyń komıýnıtı ortalyǵynda joba menedjeri bolyp jumys isteımin, - dedi Oljas Tasbergen.
Almatyda NEET-jastardyń, ıaǵnı áleýmettik oqshaýlanyp qalǵan jastardyń úlesi 2024 jyldyń I toqsanynda 7,4% - dan (47,9 myń) 6,6% - ǵa deıin (43,9 myń) tómendegen. Sondaı-aq qalada "Jobfair365" jumysqa ornalastyrý jáne "SkillBrigde" oqytý qyzmetteri bar "Jasalmaty.kz" portalyn quryldy. Aqparattyq portaldyń qazirdiń ózinde 25 myńǵa jýyq biregeı paıdalanýshylary bar. 5 myń jumys berýshi tirkelip, 5 myń bos jumys orny ornalastyryldy. Nátıjesinde 4 myń adam jumysqa ornalasqan.
- Bizdiń aýdanda jastardyń sany 77 myńǵa jýyq. Onyń ishinde NEET-jastardyń úlesi 6 myń. Jyl basynan beri Túrksib aýdanyndaǵy komıýnıtı ortalyqqa jumysqa ornalasý, shaǵyn kýrs oqý suraqtary boıynsha 1200 adam júgindi. Bizdiń maqsatymyz NEET sanatyndaǵy jastardy jumysqa ornalasýǵa kómektesip, qoǵamǵa qosý. Mundaı komıýnıtı ortalyqtary Almatynyń barlyq 8 aýdanynda bar, - dedi Túrksib aýdany boıynsha jumysqa ornalastyrý jáne shaǵyn kýrstardy oqytý menedjeri Marjan Ótegenova.
Almaty qalasy Jastar saıasaty basqarmasynyń málimetinshe, shaharda jalpy áleýmettendirý sharalarynyń arqasynda 2023 jyly 47 myńǵa jýyq jas (turaqty – 40 myń, ýaqytsha – 7 myń) jumysqa ornalastyrylǵan. Al osy jyldyń І toqsanynda 9 myńnan astam jas jumysqa ornalasyp, jastar jumyssyzdyǵynyń deńgeıi 5,2%-dan 4,6%-ǵa deıin tómendedi.
