Almatyda jastar arasynda janjal bolyp, birinen Kalashnıkov avtomaty tárkilendi

ALMATY. KAZINFORM — Almatyda bir top adamnyń arasynda janjal boldy.

Jelidegi málimetke sáıkes, oqıǵa Saıran kóliniń mańyndaǵy meıramhana janynda bolǵan. Almaty polıtsııasy jastar arasyndaǵy toptyq janjaldy Uıymdasqan qylmysqa qarsy kúres basqarmasynyń qyzmetkerleri der kezinde toqtatqanyn habarlady.

— Jedel túrde alynǵan aqparattyń arqasynda áreketter der kezinde toqtatyldy. Barlyq qatysýshylar anyqtaldy jáne ustaldy. Tintý barysynda qatysýshylardyń birinen syrtqy pishini Kalashnıkov avtomatyna uqsas maket tabylyp, tárkilendi. Atalǵan zat aınaladaǵy adamdar úshin qaýip tóndirmeıdi, — dep habarlady polıtsııadan.

Qazir bul derek boıynsha qylmystyq is qozǵalǵan. Tergeý nátıjesi boıynsha sheshim qabyldanatyn bolady.

Eske salaıyq, buǵan deıin Almatyda jolaýshylar avtobýs ishinde janjal shyǵarǵanyn jazǵanbyz.