Almatyda jasóspirimge alǵash ret jambas-san býynyn tolyq almastyrý otasy jasaldy

ALMATY. KAZINFORM – Almatydaǵy balalarǵa shuǵyl medıtsınalyq kómek kórsetý ortalyǵynda biregeı ota jasaldy. 

Almaty qoǵamdyq densaýlyq saqtaý basqarmasynyń habarlaýynsha, naýqas 13 jasynda jol-kólik oqıǵasy saldarynan jambas súıeginen, oń jaq sanynan jáne tize býynynan aýyr jaraqat alǵan. Kópjyldyq emdeý men ońaltý sharalaryna qaramastan, jambas-san býynynyń tirek-qımyl qyzmetin tolyq qalpyna keltirý múmkin bolmaǵan. Qyz bala bireýdiń kómegimen qozǵalyp, oń aıaǵynan aqsap júrgen.

Qoıylǵan dıagnoz – san súıegi basynyń aseptıkalyq nekrozy, ıaǵnı san moıny synýynyń asqynýy – jambas súıeginiń qısaıýyna, omyrtqa jotasynyń deformatsııasyna jáne turaqty aýyrsyný sındromyna ákelý qaýpin týdyrǵan.

Úsh jyl boıy statsıonarlyq em úı jaǵdaıyndaǵy ońaltýmen almasyp otyrdy: dárigerler zaqymdanǵan aıaq-qoldy kezeń-kezeńimen qalpyna keltirip, aǵzanyń qalpyna kelýine múmkindik beretin úzilister jasap, keıin emdeýdiń kelesi kezeńine kóshken.

– Naýqas 17 jasta bolǵandyqtan, biz úshin bul ońaı sheshim bolǵan joq. Alaıda jambas-san býynyn tolyq endoprotezdeýden basqa balama bolǵan joq, - dedi Ortalyqtyń travmatologııa bóliminiń meńgerýshisi Baqyt Qojahanov.

100 mınýtqa sozylǵan ota 2026 jyly 7 aqpanda sátti ótti. Ota aldynda basqa emhanalardyń mamandary qatysqan birneshe konsılıým uıymdastyrylyp, Astanadaǵy áriptesterdiń tájirıbesi zerdelendi. Operatsııalyq top quramynda Baqyt Qojahmetov, Darhan Súkbaev, Bolat Ermekuly, al anestezıolog – Tańjaryq Bıdaıbaı boldy.

Otadan keıin eki apta ishinde qyz bala hırýrgterdiń baqylaýymen bastapqy ońaltý kezeńinen ótti. Jasóspirimniń anasynyń aıtýynsha, qyzynyń jaǵdaıy aıtarlyqtaı jaqsarǵan.

– Aıaqtarynyń uzyndyǵy teńestirildi, qyzym ózdiginen júre bastady, qazir qalpyna kelý úderisin jalǵastyryp jatyr. Qazir úıdemiz, alda ári qaraıǵy ońaltý kezeńi bar, - dedi qyzdyń anasy.

Eske salaıyq, buǵan deıin Almatyda júrektiń aýyr aqaýy bar júkti áıelge shuǵyl ota jasalǵanyn jazǵan edik.