Almatyda jasóspirimderdi tsıfrlyq daǵdyǵa tegin úıretetin halyqaralyq ortalyq ashylady

ALMATY. KAZINFORM — Óńirlik kommýnıkatsııalar qyzmetiniń alańynda Almaty qalasy tsıfrlandyrý basqarma basshysynyń orynbasary Meıram Dúısekov tsıfrlyq quraldar arqyly adam kapıtalyn damytýǵa erekshe kóńil bólinip otyrǵanyn aıtty.

Onyń sózinshe, 2026 jyly Alatau Creative Hub bazasynda 12–18 jas aralyǵyndaǵy jasóspirimderge arnalǵan tegin qosymsha bilim beretin halyqaralyq TUMO ortalyǵy ashylady. Onda segiz baǵyt boıynsha bilim beriledi. Olardyń qatarynda generatıvti jasandy ıntellekt, robototehnıka, veb-ázirleý men anımatsııa bar.

— Bul mektep oqýshylaryna zamandyq tsıfrlyq daǵdylardy meńgerip, bolashaq mamandyǵyn tańdaýǵa múmkindik beredi, — dedi Meıram Dúısekov.

Sonymen qatar, vedomstvo ókili keıingi ýaqytta qalanyń startap-ekojúıesine 19,2 mıllıon AQSh dollary kóleminde ınvestıtsııa tartylyp, shamamen 6,9 myń jumys orny ashylǵanyn atap ótti. Aıtýynsha, aldaǵy ýaqytta 300 jańa startap-joba quryp, 100 mıllıon AQSh dollarynan kem bolmaıtyn ınvestıtsııa tartý josparlanyp otyr.

Odan bólek 2026–2027 jyldarǵa arnalǵan josparlar aıasynda kólik, qaýipsizdik jáne áleýmettik qyzmetter salalarynda azamattardy qoldaýǵa arnalǵan ıntellektýaldy daýys jáne mátindik bottardy iske qosý, sondaı-aq Almatyda BLAST halyqaralyq týrnırin ótkizý kózdelip otyr.

Eske salaıyq, Almatyda 1 mamyrdan bastap júrgizýshisiz 50 avtokólik taksı qyzmetin atqarady.