EAEO elderin úshinshi tarappen biryńǵaı tranzıttik júıede jumys isteýge mindetteıin zań maquldandy
ASTANA. KAZINFORM – Senat «Eýrazııalyq ekonomıkalyq odaq pen úshinshi taraptyń biryńǵaı kedendik tranzıt júıesi týraly kelisimdi ratıfıkatsııalaý týraly» Zańdy maquldady.
Senator Bekbol Orynbasarov zańdy áriptesterine tanystyra otyryp, usynylyp otyrǵan ózgerister kedendik rásimderdi tereń tsıfrlandyrýǵa arnalǵanyn atap ótti.
— Biryńǵaı tranzıttik deklaratsııany tek elektrondyq qujat túrinde engizý, elektrondyq deklaratsııalaýǵa kóshý jáne kedendik operatsııalardy júrgizýdiń biryńǵaı, úzdiksiz tártibin belgileý artyq bıýrokratııalyq apparatty joıady.
Qujattaǵy «úshinshi taraptarǵa» EAEO-ǵa kirmeıtin memleketter, sondaı-aq iri halyqaralyq uıymdar men ıntegratsııalyq birlestikter jatady. Biz tek syrtqy naryqtarǵa beıimdelip qana qoımaımyz, úshinshi elderge biryńǵaı, tekserilgen jáne qaýipsiz tehnologııalyq standartty usynamyz.
Ozyq tehnologııalardy ıntegratsııalaýǵa, atap aıtqanda, navıgatsııalyq plombalardy mindetti túrde qoldanýǵa erekshe nazar aýdarý qajet. Bul Odaqtyń jáne úshinshi elderdiń búkil aýmaǵy boıynsha naqty ýaqyt rejıminde tasymaldaýdy úzdiksiz qadaǵalaýǵa múmkindik beredi, — dedi ol.
Depýtat atalǵan kelisim ratıfıkatsııalansa, jol boıynda júkterdiń urlanýy nemese aýystyrylý qaýpin barynsha azaıatynyn aıtty.
— Keden organdary sheshimderiniń ózara tanylýy men protsesterdi avtomattandyrýdyń arqasynda biz ishki shekaralardaǵy fızıkalyq tekserýlerdiń sanyn qysqarta alamyz. Nátıjesinde júkti óńdeý ýaqyty birneshe saǵattan rekordtyq otyz mınýtqa deıin qysqarady.
Marshrýttardy ońtaılandyrý jáne shekaradaǵy irkilisterdi joıý bıznestiń jalpy logıstıkalyq shyǵyndaryn 15 paıyzdan 30 paıyzǵa deıin tómendetýge múmkindik beredi. Bul sharalar júkterdi tasymaldaý kezinde jyldamdyqty aıtarlyqtaı arttyryp, ýaqytty únemdeıdi.
Kelisimdi ratıfıkatsııalaý respýblıkamyzda júrgizilip jatqan aýqymdy ınfraqurylymdyq jobalardy iske asyrýǵa tikeleı yqpal etedi. Kaspııdegi Aqtaý jáne Quryq porttaryn jańǵyrtý, avtojol jelilerin keńeıtý, qurǵaq porttar men temirjoldar qurylysy qýatty sınergııalyq tıimdilikke ıe bolady, — dedi Bekbol Orynbasarov.
Sondaı-aq ol EAEO aıasynan tys taraptarmen ózara is-qımyl jasaý eldiń tranzıtin jańa deńgeıge shyǵaratynyn aıtady.
— Biz Azııa, Parsy shyǵanaǵy jáne Eýropa naryqtaryna tikeleı ári jyldam shyǵý múmkindigin alamyz. Jańa seriktestermen kelisimsharttar jasaı otyryp, ózimizdiń kedendik erejelerimizdi olardyń kólik dálizderimen baılanystyramyz jáne júkter úshin kez kelgen kedergilerdi joıamyz.
Biz Transkaspıı halyqaralyq kólik baǵyty (THKB), Jańa Jibek joly jáne «Soltústik — Ońtústik» dálizi sııaqty negizgi marshrýttardyń tartymdylyǵyn aıtarlyqtaı arttyra alamyz, — dedi senator.
Buǵan deıin EAEO elderi arasynda júk áýe kemelerine 12 jyldyq bajsyz rejım engizilgen bolatyn.
