Almatyda jasóspirimder toby kámeletke tolmaǵan qyzǵa shabýyl jasady
ASTANA. KAZINFORM – Almatyda kámeletke tolmaǵan qyzǵa qatysty jasóspirimder tobynyń zańǵa qaıshy áreketteri boıynsha qylmystyq is qozǵaldy. Bul týraly Almaty qalalyq Polıtsııa departamenti habarlady.
Vedomstvonyń málimetinshe, oqıǵa áleýmettik jelilerge monıtorıng júrgizý barysynda anyqtalǵan. Internette jarııalanǵan beınejazba keıinnen óshirilgen.
– Atalǵan derek boıynsha Naýryzbaı aýdandyq polıtsııa basqarmasy sotqa deıingi tergep-tekserýdi bastady. Qazirgi ýaqytta oqıǵaǵa qatysy bar barlyq tulǵalar anyqtaldy. Oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý áreketteri júrgizilip jatyr. Tergeý barysy basshylyqtyń erekshe baqylaýynda, – dep málimdedi polıtsııa.
Sonymen qatar Kazinform agenttigi Almaty qalalyq Bilim basqarmasyna resmı saýal joldady. Materıal jarııalanǵan sátke deıin vedomstvodan jaýap túspegen. Túsinikteme alynǵannan keıin aqparat tolyqtyrylady.
Aıta keteıik, buǵan deıin Qaskeleńde jasóspirimder er adamdy soqqyǵa jyqqan bolatyn. Keıin polıtsııa oqıǵaǵa qatysýshylardyń ustalǵanyn habarlaǵan edi.
