Almatyda jasóspirimder balany uryp-soǵyp, oǵan shıki balyq jegizbek bolǵan
ALMATY. KAZINFORM — Almatylyq áıel ulyna bir top jasóspirimniń álimjettik kórsetkenine shaǵymdandy.
Almaty turǵyny bir top jasóspirimniń bir aı boıy úıiniń aýlasynda 11 jastaǵy ulyn jáne basqa da balalardy uryp-soǵyp, qorlaǵanyn málimdedi.
Áıeldiń aıtýynsha, 13–14 jastaǵy jasóspirimder ulynyń ishinen jáne búıreginen urǵan, balaǵat sózder aıtqan. Sondaı-aq Saıranda balyq aýlap, shıki balyqty balanyń aýzyna jáne qulaǵyna tyqqan.
Almaty qalalyq polıtsııa departamenti atalǵan derek boıynsha Almaly aýdandyq polıtsııa basqarmasy tekserý júrgizip jatqanyn málimdedi.
Polıtsııa bolǵan oqıǵanyń barlyq mán-jaıy jan-jaqty ári obektıvti túrde zerdelenetinin, sonyń ishinde oqıǵaǵa qatysýshylardyń barlyǵy anyqtalatynyn habarlady.
— Quqyqqa qaıshy áreketter faktileri rastalǵan jaǵdaıda kámeletke tolmaǵandardyń zańdy ókilderine zańnamaǵa sáıkes sharalar qoldanylady. Sondaı-aq belgilengen tártippen jasóspirimderdi profılaktıkalyq esepke qoıý máselesi qaralady, — dep habarlady Almaty qalalyq polıtsııa departamentiniń baspasóz qyzmeti.
Polıtsııa balalardyń quqyqtary men qaýipsizdigin qorǵaýǵa erekshe nazar aýdarylatynyn atap ótti. Mundaı árbir ótinish zańnamada belgilengen tártippen qaralady.
Eske salaıyq, Jambyl oblysynda jasóspirimder arasyndaǵy janjaldan keıin oqýshy kóz jumǵan edi.
